নেশ্যনেল ডেস্ক, ২৪ মে' : ছত্তীশগড়ৰ মাওবাদী প্ৰভাৱিত অঞ্চলত নিৰাপত্তা বাহিনীৰ অভিযান অব্যাহত আছে । ইয়াৰ মাজতে নাৰায়ণপুৰ, দান্তেৱাড়া আৰু বিজাপুৰ জিলাৰ সীমান্ত অঞ্চলত নিৰাপত্তাৰক্ষী আৰু মাওবাদীৰ মাজত কেইবা ঘণ্টা ধৰি সংঘৰ্ষ চলি আছিল । মাওবাদীয়ে বনাঞ্চলৰ ভিতৰলৈ পলাই যাবলৈ চেষ্টা কৰি আছে যদিও নিৰাপত্তা বাহিনীয়ে তেওঁলোকক কোনো সুযোগ দিয়া নাই । এই এনকাউণ্টাৰত মাওবাদীৰ ৮ টা মৃতদেহ উদ্ধাৰ কৰা হৈছে । সূত্ৰৰ মতে এই সংঘৰ্ষ ইতিমধ্যে সমাপ্ত হৈছে ।
লগতে একাংশ মাওবাদী আহত হোৱাৰ আশংকা কৰা হৈছে । নাৰায়ণপুৰৰ আৰক্ষী অধীক্ষক প্ৰভাত কুমাৰ আৰু দান্তেৱাড়াৰ আৰক্ষী অধীক্ষক গৌৰৱ ৰায়ে এই সংঘৰ্ষৰ কথা নিশ্চিত কৰিছে । বৃহস্পতিবাৰে পুৱা প্ৰায় ১১ বজাৰ পৰা এই সংঘৰ্ষ আৰম্ভ হৈছিল । দুয়োফালৰ পৰা গুলীবৰ্ষণ কৰা হৈছিল ।
ইফালে নিৰাপত্তা বাহিনীয়ে মাওবাদীক উপযুক্ত প্ৰত্যুত্তৰ দিবলৈ সক্ষম হৈছে । বৃহস্পতিবাৰে সংঘৰ্ষৰ সময়ত আৰক্ষীসহ নিৰাপত্তা বাহিনীয়ে নাৰায়ণপুৰ আৰু দান্তেৱাড়াত যথেষ্ট সফলতা অৰ্জন কৰিছে । নিৰাপত্তা বাহিনীয়ে ইউনিফৰ্ম পৰিহিত ৮ টা মাওবাদীৰ মৃতদেহ উদ্ধাৰ কৰাৰ লগতে বৃহৎ পৰিমাণৰ অস্ত্ৰ-শস্ত্ৰও জব্দ কৰিবলৈ সক্ষম হৈছে ।
উল্লেখ্য যে, ২১ মে'ত নাৰায়ণপুৰ-বিজাপুৰ জিলাৰ সীমান্ত অঞ্চলত ১৬ নম্বৰ প্লেটুন আৰু ইন্দ্ৰাৱতী অঞ্চল সমিতিৰ মাওবাদীৰ উপস্থিতিৰ বিষয়ে তথ্য লাভ কৰিছিল । তাৰ পিচতে নাৰায়ণপুৰ, দান্তেৱাড়া আৰু বস্তাৰ জিলাৰ ডিআৰজি আৰু বস্তাৰ ফাইটাৰ্ছৰ সৈতে এছটিএফৰ যুটীয়া দলে তালাচী অভিযান আৰম্ভ কৰে । বৃহস্পতিবাৰে মাওবাদীয়ে নিৰাপত্তাৰক্ষীৰ ওপৰত গুলীচালনা কৰে । লগে লগে সংঘৰ্ষ তীব্ৰতৰ হৈ পৰে । গোটেই দিনটোৱে এই সংঘৰ্ষ চলি থাকে । শুকুৰবাৰে পুৱাও দুয়োপক্ষৰ মাজত সংঘৰ্ষ হয় ।
নিৰাপত্তাৰক্ষীয়ে মাওবাদী প্ৰভাৱিত নাৰায়ণপুৰ জিলাৰ আবুঝমাদ অঞ্চলত এটা নতুন শিবিৰ ধ্বংস কৰিছে । এই শিবিৰটো মোহান্দি গাঁও অৰ্ছা খণ্ড, কোহকামেটা তহচিল আৰু আৰক্ষী থানা কোহকামেটাৰ অধীনত অৱস্থিত । যাৰ বাবে মাওবাদীৰ চলাচল বন্ধ হৈ গৈছে । যাৰ বাবে মাওবাদী হতাশ হৈ নিৰাপত্তা বাহিনীক লক্ষ্য কৰি গুলীচালনা কৰিছে । তথ্য অনুসৰি এই বছৰৰ যোৱা ৪-৫ মাহত বিভিন্ন সংঘৰ্ষত ৯০ ৰো অধিক মাওবাদী নিহত হৈছে ।
