جنوبی کشمیر کے اونتی پورہ علاقے میں ہوئی ہلاکتوں میں ملوث مبینہ عسکریت پسندوں کو جلد از جلد کیفر کردار تک پہنچایا جائے گا۔ ان باتوں کا اظہار آئی جی پی کشمیر وجے کمار نے آج ہاری پاریگام اونتی پورہ کا دورہ کرنے کے بعد میڈیا سے بات کرتے ہوئے کیا۔ اس سے قبل انہوں نے اہل خانہ سے تعزیت کی اور انکی ڈھارس بندھائی۔ اس موقع پر ایس ایس پی اونتی پورہ چودھری محمد یوسف بھی موجود تھے۔ انہوں نے کہا یقینی طور پر ابھی معلوم نہیں ہو سکا ہے کہ یہ حملہ کس عسکری تنظیم نے کیا تاہم شبہ ہے کہ اس میں جیش محمد ملوث ہو سکتی ہے۔
آئی جی پی کشمیر نے بتایا کہ اس علاقے میں عسکریت پسندوں کی نقل و حمل رہتی ہے اور گذشتہ شب دو عسکریت پسندوں نے اندھا دھند فائرنگ کی جس کے نتیجے میں ایس پی او فیاض، اسکی اہلیہ اور بیٹی بھی زخمی ہوگئی۔ تاہم اسپتال منتقل کرتے وقت فیاض ہلاک ہوا جبکہ دیگر دو اہل خانہ بھی بعد ازاں زندگی کی جنگ ہار گئے۔