No Funds To Gram Panchayats In Mahbubnagar: మహబూబ్‌నగర్ జిల్లా గండీడ్ మండలానికి చెందిన వివిధ గ్రామాల సర్పంచ్లు ఇటీవలే కొనుగోలు చేసిన ట్రాక్టర్లను.. మండల పరిషత్ కార్యాలయం వద్ద నిలిపి ధర్నాకు దిగడం చర్చనీయాంశంగా మారింది. ట్రాక్టర్లు వద్దని, వాటి ఈఎంఐ, డీజిల్ బిల్లులు, కార్మికుల వేతనాలు చెల్లించలేకపోతున్నామంటూ.. సర్పంచ్లు నిరసనకు దిగారు. వాటిని అక్కడే వదిలేసి వెళ్లేందుకు సిద్ధమయ్యారు. ఎలాగో అధికారులు సర్దిచెప్పడంతో తిరిగి తీసుకెళ్లారు. గ్రామ పంచాయతీల ఆర్థిక దుస్థితికి ఆ సంఘటన అద్దం పడుతోంది.
చేసిన పనులకు బిల్లులు రాక, చేయాల్సిన పనులకు నిధులు లేక.. సొంత డబ్బులు ఖర్చు చేస్తూ ఎలాగోలా నెట్టుకొస్తున్నారు సర్పంచ్లు. కొన్ని నెలలుగా రాష్ట్ర ఆర్థిక సంఘం, 15వ ఆర్థిక సంఘం నిధులు రాకపోవడంతో గ్రామ పాలన కుంటుపడింది. ప్రభుత్వం నుంచి నిధులు రాకపోయినా.. ఇంటి పన్నుల ద్వారా వసూలు చేసిన నిధులైనా వాడుకుందామంటే.. డబ్బులు తీసుకోకుండా పంచాయతీ ఖాతాలు స్తంభింపజేశారంటూ సర్పంచ్లు ఆవేదన వ్యక్తం చేస్తున్నారు.
పల్లె ప్రగతి, ఉపాధి హామీ కింద ఇప్పటికే గ్రామాల్లో సర్పంచిలు చాలా రకాల పనులు చేపట్టారు. పల్లె ప్రకృతి వనాలు, డంపింగ్‌ యార్డులు, వైకుంఠ దామాలు, చెత్త వేరు చేసే షెడ్లు, సీసీ రోడ్లు, మురికి కాల్వల్లాంటి పనులు పూర్తి చేశారు. కానీ సకాలంలో బిల్లులు రాకపోవడంతో అప్పుల పాలవుతున్నామని వారు ఆవేదన చెందుతున్నారు. గ్రామంలో పని చేసే పంచాయతీ కార్మికులు నిరసన బాట పడుతున్నారు. ఇచ్చేదే చాలీచాలని జీతాలు, వాటినీ సకాలంలో ఇవ్వకపోవడంపై ఆగ్రహం వ్యక్తం చేస్తున్నారు. ఇప్పటికైనా రాష్ట్ర ప్రభుత్వం స్పందించి గ్రామ పంచాయతీ నిధులు విడుదల చేయాలని సర్పంచిలు డిమాండ్ చేస్తున్నారు. ఇదే పరిస్థితి కొనసాగితే గ్రామాల్లో పనులు నిలిపివేస్తామని పంచాయతీ కార్మికులు హెచ్చరిస్తున్నారు.