'సచిన్​ కోసం రెండుసార్లు 500 కి.మీ సైకిల్​ మీద వెళ్లా.. కానీ..'

మాస్టర్ బ్లాస్టర్ సచిన్ తెందూల్కర్​కు వీరాభిమానైన సుధీర్​ గురించి ప్రత్యేకంగా చెప్పాల్సిన అవసరంలేదు. సచిన్​ ఆడే ప్రతి మ్యాచ్​లో పాల్గొని అతడు సందడి చేశాడు. అసలు అతడు మాస్టర్​​కు వీరాభిమానిగా ఎలా మారాడు? ఎప్పుడు తొలిసారి కలిశాడు? సైకిల్​పై 500 కి.మీ ప్రయాణించి సచిన్​ చూసేందుకు వెళ్లిన ప్రయత్నం ఫలించిందా? వంటి విశేషాలను సుధీర్​.. 'ఈటీవీ భారత్'కు ప్రత్యేకంగా చెప్పాడు.

Sachin Die Hard Fan Sudheer: మాస్టర్​ బ్లాస్టర్​ సచిన్​ తెందూల్కర్​ వీరాభిమాని సుధీర్​ కుమార్​ చౌదరి అంటే బహుశా తెలియని టీమ్​ఇండియా అభిమానులు ఉండకపోవచ్చు. సచిన్​ రిటైర్మెంట్ వరకు భారత్​ క్రికెట్​ జట్టు ఆడిన ప్రతి మ్యాచ్​లోనూ సుధీర్​ స్టాండ్స్​లో​ సందడి చేసేవాడు. విదేశాలకు కూడా వెళ్లి సచిన్​ ఆడిన మ్యాచ్​లను చూసేవాడు. కొన్ని సందర్భాల్లో బీసీసీఐ ప్రత్యేక రాయితీ కల్పించి మరీ విదేశాల్లో జరిగే మ్యాచ్​లు చూడ్డానికి సుధీర్​ను పంపేది. అయితే సచిన్‌ సైతం సుధీర్‌కు చాలా మర్యాద ఇచ్చేవాడు.

ప్రస్తుతం రోడ్ సేఫ్టీ వరల్డ్​ సిరీస్​లో భాగంగా భారత లెజెండ్స్​ జట్టుకు సచిన్​ సారథిగా వ్యవహరిస్తున్నాడు. 49 ఏళ్ల వయసులోనూ బ్యాట్‌తో మైదానంలో ఆనాటి మెరుపులు మెరిపిస్తూ అభిమానులను అలరిస్తున్నాడు. ఇప్పటికే సెమీ ఫైనల్స్​కు చేరుకున్న భారత లెజెండ్స్​ జట్టు.. గురువారం ఛత్తీస్​గఢ్​లోని​ షహీద్​ వీర్​ నారాయణ్​ సింగ్​ స్టేడియంలో ఆస్ట్రేలియా లెజెండ్స్​తో తలపడనుంది. దీంతో సచిన్ వీరాభిమాని సుధీర్ కుమార్ చౌదరి మ్యాచ్​ చూడటానికి రాయ్‌పుర్ చేరుకున్నాడు. ఈ సందర్భంగా అతడు 'ఈటీవీ భారత్'​తో ప్రత్యేకంగా ముచ్చటించాడు. ఆ విశేషాలు అతడి మాటల్లోనే..

ఈటీవీ భారత్​: మొదటగా సచిన్​పై అంత అభిమానం మీకు ఎలా కలిగింది?
సుధీర్​ కుమార్​ చౌదరి: కాలేజీ రోజుల్లో ఒక జర్నలిస్ట్ నాకు సచిన్​ గురించి చెప్పాడు. అతడ్ని కలవమని కూడా సలహా ఇచ్చాడు. అప్పటి నుంచి సచిన్​పై అభిమానం పెరుగుతూ వచ్చింది.

ఈటీవీ భారత్: సచిన్​కు వీరాభిమానిగా ఎలా మారారు?
సుధీర్ కుమార్: 2001 జనవరి 19న భారత్​ జట్టు ఆడిన మ్యాచ్​ను తొలిసారిగా చూశాను. ఆ తర్వాత అదే నెలలో కాన్పూర్​లో జరిగిన మరో మ్యాచ్​ వీక్షించాను. అదే ఏడాదిలో జరిగిన భారత్​-న్యూజిలాండ్ వన్డే మ్యాచ్​కు కూడా వెళ్లాను. అలా నా విద్యార్థి జీవితంలో మూడు మ్యాచులు చూశాను. అలా అప్పటి నుంచి సచిన్​గా వీరాభిమానిగా మారిపోయాను.

ఈటీవీ భారత్​: మాస్టర్​ను కలవడానికి తొలిసారి ఎప్పుడు ప్రయత్నించారు?
సుధీర్​: 2002లో నేను సచిన్​ను కలవడానికి సుమారు 500 కి.మీ.. సైకిల్‌పై బిహార్​లోని ముజఫర్​పుర్​ నుంచి జంషెద్​పుర్​కు రెండు సార్లు వెళ్లాను. కానీ ఆ సమయంలో మాస్టర్​ అనారోగ్యం పాలవ్వడం వల్ల కలవలేకపోయాను.

ఈటీవీ భారత్​: సచిన్​ను మొదటిసారి ఎప్పుడు కలిశారు?
సుధీర్​: సచిన్​ను మొదటిసారి ముంబయిలోనే కలిశాను. అతడు ఆడిన ప్రతి మ్యాచ్‌ చూశాను.. తొమ్మిదేళ్ల క్రితం అంతర్జాతీయ క్రికెట్​కు సచిన్​ వీడ్కోలు పలికాడు. కానీ నేను ఇప్పటికీ భారత జట్టుకు పూర్తి మద్దతు ఇస్తున్నాను. అయితే సచిన్ ఇప్పుడు రోడ్ సేఫ్టీ సిరీస్​ ద్వారా సెకండ్​ ఇన్నింగ్స్‌ను ప్రారంభించాడు. దీంతో ఇప్పుడు మరోసారి స్టేడియానికి వెళ్లి అతడికి మద్దతు తెలిపే అవకాశం నాకు లభించింది. అందుకు చాలా సంతోషంగా ఉంది.

ఈటీవీ భారత్​: టీమ్​ఇండియా ఆడిన మ్యాచులు విదేశాల్లో ఎక్కడైనా చూశారా?
సుధీర్: నేను భారత్​లోనే కాకుండా పాకిస్థాన్​.. లాహోర్​కు వెళ్లి కూడా దాయాది జట్ల మధ్య జరిగిన మ్యాచ్​ను చూశాను. ఇంగ్లండ్​, బంగ్లాదేశ్, ఆస్ట్రేలియా, వెస్టిండీస్​ దేశాలకు కూడా వెళ్లి మరీ భారత్​ క్రికెట్ జట్టుకు మద్దతు తెలిపాను.
వీటితో పాటు అతడు చెప్పిన మరిన్ని విశేషాల కోసం ఈ వీడియో చూడండి.

ఇవీ చదవండి:ఏడేళ్ల తర్వాత క్రీడా సంబరం.. పోటీ పడనున్న అథ్లెట్లు!