సోషల్ మీడియా వేదికగా మరో సినిమాపై నిరసనలు వెల్లువెత్తుతున్నాయి. బాలీవుడ్ నటుడు ఫర్హాన్ అక్తర్(Farhan Akhtar) ప్రధానపాత్రలో నటించిన 'తూఫాన్'(Toofaan) చిత్రం గతకొంతకాలంగా వివాదాలకు కేంద్రంగా మారింది. ఒక గ్యాంగ్‌స్టర్‌ బాక్సింగ్‌ ఛాంపియన్‌ ఎలా అయ్యాడు.. ఆ తర్వాత బాక్సింగ్‌కు ఎందుకు దూరమయ్యాడు అనే కథాంశంతో డైరెక్టర్‌ రాకేశ్‌ ఓం ప్రకాశ్ మెహ్రా(Rakeysh Omprakash Mehra) ఈ సినిమాను తెరకెక్కించారు. ఈ సినిమాలో పరేశ్‌రావల్‌ కీలకపాత్రలో కనిపించనున్నారు.
'భాగ్ మిల్కా భాగ్'(Bhaag Milkha Bhaag) తర్వాత ఫర్హాన్ అక్తర్-రాకేశ్‌ ఓం ప్రకాశ్ మెహ్రా కలయికలో వస్తున్న చిత్రమిది. దీంతో 'తూఫాన్'పై భారీ అంచ‌నాలు నెలకొన్నాయి. జులై 16 నుంచి ప్రముఖ ఓటీటీ వేదిక అమెజాన్‌ ప్రైమ్‌ వీడియోలో అందుబాటులోకి రానుంది. ఇప్పటికే విడుదలైన చిత్ర ట్రైలర్‌ విశేషాదరణ సొంతం చేసుకుంది. ఇదిలా ఉండగా ఈ చిత్రంపై ట్విటర్‌లో నిరసనలు వెల్లువెత్తుతున్నాయి. కొంతమంది నెటిజన్లు 'Boycott Toofaan' అనే పేరుతో సినిమా విడుదలను వ్యతిరేకిస్తూ ట్వీట్లు పెడుతున్నారు.