Akhanda Producer: "అడ్వాన్స్‌లు ఇచ్చి ముందే హీరోల్ని బుక్‌ చేసుకోవడం నాకు తెలియదు. ఏదేమైనా సరే.. ముందు కథ వినాలి. నచ్చితే అదెవరికి సరిపోతుందో ఆ హీరోను ఒప్పించి సినిమా చేయాలనుకుంటా" అన్నారు నిర్మాత మిర్యాల రవీందర్ రెడ్డి. ఇప్పుడాయన నిర్మాణంలో బాలకృష్ణ హీరోగా రూపొందించిన చిత్రం 'అఖండ'. బోయపాటి శ్రీను తెరకెక్కించారు. ఇటీవలే విడుదలై మంచి ఆదరణ దక్కించుకుంది. బుధవారం మిర్యాల రవీందర్ పుట్టినరోజు. ఈ నేపథ్యంలోనే మంగళవారం హైదరాబాద్‌లో విలేకర్లతో చిత్ర విశేషాలు పంచుకున్నారు.
"అఖండ' ఫలితం సంతృప్తినిచ్చిందా? ఇంతటి విజయాన్ని ఊహించారా?
"2018లో నాకు తొలిసారి దర్శకుడు బోయపాటి ఈ కథ చెప్పారు. అది విన్నప్పుడే ఇదెంత మార్కెట్‌ చేస్తుందన్నది ముందే రాసిచ్చేశా. సినిమా విజయం పట్ల నాకంత నమ్మకం. ఆ నమ్మకం వల్లే విడుదల విషయంలో కాస్త ఆలస్యమైనా భయపడలేదు. సినిమా విడుదలకు ముందు హీరో, దర్శకుడు ఎక్కడా మాట్లాడలేదు. నేను విడుదలకు ముందు నుంచే దీనిపై నమ్మకంగా మాట్లాడుతూ వచ్చాను. ఎందుకంటే ఈ చిత్రంలో అన్ని ఎమోషన్స్‌ సమంగా కుదిరాయి. బాలకృష్ణ అభిమానులకు కావాల్సిన మాస్‌ పాట ఉంది. వీటన్నింటికీ తోడు శివుడి అంశగా ద్వితీయార్ధంలో వచ్చే బాలకృష్ణ అఘోరా పాత్ర మరో ఆకర్షణ. ఇవన్నీ మేమనుకున్నట్లుగానే ప్రేక్షకులకు బాగా ఎక్కేశాయి".
ఈ చిత్రానికి ముందు ఇటు బాలకృష్ణ, అటు బోయపాటి హిట్ ట్రాక్‌లో లేరు కదా. ఆ విషయంలో ఏమన్నా భయపడ్డారా?
"అసలెప్పుడూ ఆ ఆలోచన రాలేదు. పెద్ద దర్శకుడు, స్టార్‌ హీరో అన్నది రేర్‌ కాంబినేషన్. వాళ్లపై నమ్మకంతోనే ఈ చిత్రం చేశాను. నాకు తెలిసి స్టార్‌ హీరోలకు వరుసగా పది ప్లాప్‌లు వచ్చినా.. ఒక్క హిట్ పడితే చాలు ఆ పది చిత్రాలకు ముందున్న మార్కెట్‌ వచ్చేస్తుంది".
Akhanda Movie Collections:
ఇప్పుడున్న పరిస్థితుల్లోనూ 'అఖండ' వందకోట్ల క్లబ్‌లోకి చేరింది. అన్ని చోట్లా బ్రేక్‌ ఈవెన్‌ దాటేశారా?
"ఈ చిత్ర విషయంలో అన్ని ఏరియాలు బ్రేక్‌ ఈవెన్‌ అయ్యాయి. సినిమా ఓ విజువల్‌ వండర్‌లా వచ్చింది కాబట్టి.. ఎలాంటి పరిస్థితుల్లో విడుదల చేసినా ట్రెండ్‌ సెట్టర్‌ అవుతుందని తెలుసు. నాలుగు రోజుల్లోనే బయ్యర్స్‌ అంతా బయటపడతారని ముందే ఊహించా. ఇప్పుడిందుకు తగ్గట్లుగానే మా అంచనాలు నిజమయ్యాయి".
ఏపీలోని టికెట్‌ ధరల వల్ల వసూళ్లు ఎంత శాతం తగ్గాయనుకుంటున్నారు?