Srilanka PM House Fired: శ్రీలంకలో నిరసనకారుల ఆగ్రహం చల్లారడం లేదు. శనివారం మధ్యాహ్నం అధ్యక్ష నివాసంలోకి చొచ్చుకెళ్లిన ఆందోళనకారులు.. సాయంత్రం ప్రధాని రణిల్ విక్రమసింఘే ప్రైవేటు నివాసానికి నిప్పంటించారు. ప్రధానిగా రణిల్ రాజీనామా నిర్ణయం ప్రకటించిన కొద్ది గంటల్లోనే ఈ ఘటన జరగడం గమనార్హం. ఆందోళనకారులను చెదరగొట్టడానికి భద్రతా సిబ్బంది టియర్ గ్యాస్ ప్రయోగించినా.. వారిని దాటుకుంటూ లోపలికి వెళ్లిపోయారు. ప్రధానికి చెందిన కొన్ని వాహనాలను సైతం ఆందోళనకారులు ధ్వంసం చేసినట్లు స్థానిక వార్తాసంస్థలు తెలిపాయి.
21:40 July 09
రెచ్చిపోయిన ఆందోళనకారులు.. శ్రీలంక ప్రధాని ఇంటికి నిప్పు
గత కొంత కాలంగా ఆర్థిక, ఆహార సంక్షోభంతో కొట్టుమిట్టాడుతోన్న శ్రీలంకలో శనివారం నిరసనలు తీవ్ర రూపం దాల్చాయి. తొలుత వేలాది మంది ఆందోళనకారులు ఆ దేశ అధ్యక్షుడు గొటబాయ రాజపక్స అధికారిక నివాసంలోకి దూసుకెళ్లారు. అయితే, అంతకుముందే ఆయన తన ఇంటి నుంచి పరారయ్యారు. ఈ క్రమంలోనే స్పీకర్ అధ్యక్షతన జరిగిన పార్టీ నేతల సమావేశం అనంతరం రణిల్ విక్రమసింఘే తన రాజీనామాను ప్రకటించారు. అఖిలపక్ష ప్రభుత్వాన్ని ఏర్పాటు చేసేందుకు పదవులకు రాజీనామా చేయాలని విక్రమసింఘే, గొటబాయలను పార్టీ నేతలు కోరిన నేపథ్యంలోనే ఈ నిర్ణయం తీసుకున్నట్లు తెలుస్తోంది. అయితే.. గొటబాయ రాజపక్స జులై 13న అధ్యక్ష పదవికి రాజీనామా చేసేందుకు అంగీకరించారని పార్లమెంటు స్పీకర్ వెల్లడించారు.
ఇవీ చదవండి:లంకేయుల కన్నెర్ర.. తారస్థాయికి ఆందోళనలు.. ప్రధాని రాజీనామా
శ్రీలంక నిరసనలు ఉద్ధృతం.. అధ్యక్షుడి నివాసం నుంచి పారిపోయిన రాజపక్స!