Russian Jet With US Drone : సిరియాలో అమెరికా, రష్యా వాయుసేనల మధ్య ఉద్రిక్తతలు తలెత్తాయి. అమెరికాకు సంబంధించిన డ్రోన్లపైకి రష్యా ఫైటర్ జెట్లు మరోసారి దూసుకొచ్చాయి. సిరియాలో ఆపరేషన్ చేస్తుండగా.. 24 గంటల వ్యవధిలోనే రెండుసార్లు దూసుకొచ్చాయని అమెరికా వాయుసేన తెలిపింది. రష్యా ఫైటర్ ఎస్యూ-34 ఫైటర్ జెట్లు వాటి సమీపం నుంచి ప్రమాదకరంగా వెళ్లడమే కాకుండా.. మంటలు రాజేసి ఎంక్యూ-9 రీపర్ల సామర్థ్యం దెబ్బతినేలా చేశాయని తెలిపింది. రష్యా జెట్లను తప్పించుకునేందుకు అనేక విన్యాసాలు చేయాల్సి వచ్చిందని చెప్పింది. దీనికి సంబంధించిన వీడియోను అమెరికా వాయుసేన విడుదల చేసింది.
"సిరియాలో మా మూడు డ్రోన్లు ఇస్లామిక్‌ స్టేట్‌ గ్రూప్‌నకు సంబంధించి ఓ రహస్య ఆపరేషన్ చేస్తున్నాయి. ఇదే సమయంలో మూడు రష్యా విమానాలు అదేపనిగా వాటిని వెంటాడాయి. ఓ రష్యా పైలట్‌ నిర్వాకం వల్ల మంటలు చెలరేగి.. మా రీపర్‌ పనితీరు దెబ్బతింది. ఇలాంటి నిర్లక్ష్య ప్రవర్తనను మానుకోవాలని రష్యా దళాలను కోరుతున్నాం. వాయుసేన వృత్తిపరమైన ప్రమాణాలను పాటించాలి. తద్వారా మేము సిరియాలో ఐసిస్ను అంతం చేసేందుకు మా దళాలు దృష్టి సారిస్తాయి."
-అలెక్స్‌ గ్రెన్‌కెవిచ్‌, పశ్చిమాసియా 9వ వాయుసేన కమాండర్‌ లెఫ్టినెంట్‌ జనరల్
మొదటి ఘటన బుధవారం ఉదయం 10.40 గంటలకు జరిగింది. రెండో ఘటన గురువారం ఉదయం 9.30 గటంలకు వాయవ్య సిరియాలో జరిగింది. ఈ డ్రోన్లలో ఎలాంటి ఆయుధాలు ఉండవు. కేవలం నిఘా వ్యవస్థల కోసం వీటిని ఉపయోగిస్తారు. ఈ ఘటనపై స్పందించారు అమెరికా సెంట్రల్ కమాండ్ హెడ్ జనరల్ ఎరిక్ కురిల్లా. తమ ప్రయత్నాలను రష్యా అడ్డుకోవడం వల్ల సిరియా గగనతలంలో మరింత ముప్పును పెంచుతోందని చెప్పారు.