Colombia Serial Killer Dead : 1990ల్లో 190 మందికిపైగా చిన్నారులను పొట్టనపెట్టుకున్న కొలంబియా సీరియల్ కిల్లర్ ఆస్పత్రిలో మరణించినట్లు జైలు అధికారులు వెల్లడించారు. ఉత్తర కొలంబియాలోని వల్లెడుపర్‌లోని ఆస్పత్రిలో చనిపోయినట్లు నేషనల్ పెనిటెన్షియరీ అండ్ ప్రిజన్ ఇన్‌స్టిట్యూట్ తెలిపింది. అయితే అతడి మృతికి గల కారణాలు మాత్రం వెల్లడించలేదు.
అసలు ఎవరీ కిల్లర్?
Colombian Serial Killer Garavito : లూయిస్ ఆల్ఫ్రెడో గారావిటో అలియాస్ ది బీస్ట్(66).. 1957లో కొలంబియన్ డిపార్ట్‌మెంట్ ఆఫ్ క్విండియోలో జన్మించాడు. వీధి వ్యాపారిగా నటిస్తూ.. దిగువ మధ్య తరగతి కుటుంబాల పిల్లలను కిడ్నాప్ చేసి అనేక మంది చిన్నారులను హత్య చేశాడు. 8-16 మధ్య వయసు గల చిన్నారులను పొట్టపెట్టుకున్నాడు. పెరీరా, అర్మేనియా, తుంజాలో మైనర్ల అదృశ్యాల కేసుల్లో గారావిటోపై అనుమానంతో అతడి కోసం పోలీసులు గాలింపు చర్యలు చేపట్టారు.
కోర్టులో నేరాన్ని ఒప్పుకున్న గారావిటో
చివరకు 1999 ఏప్రిల్లో అత్యాచార యత్న ఆరోపణలతో గారావిటోను పోలీసులు అరెస్ట్ చేశారు. ఆ తర్వాత కోర్టులో ప్రవేశపెట్టారు. ఆ సమయంలో 1994 నుంచి 59 కొలంబియా నగరాల్లో 114 చిన్నారుల మృతదేహాలు లభ్యమవ్వడాన్ని న్యాయమూర్తి ప్రస్తావించారు. 'ఆ చిన్నారుల హంతుకుడు నీవేనా?' అని న్యాయమూర్తి ప్రశ్నించారు. ఆ సమయంలో గారావిటో తాను చేసిన నేరాలను అంగీకరించాడు. తనను క్షమించమని వేడుకున్నాడు. 190 కంటే ఎక్కువ హత్యలు చేసినట్లు ఒప్పుకున్నాడు. అదే సంవత్సరం గారావిటో కోర్టు విచారణలో బాధిత కుటుంబాలకు క్షమాపణలు చెప్పాడు గారావిటో. తాను చేసిన ప్రతీదానికీ క్షమాపణలు కోరుతున్నట్లు చెప్పాడు. చిన్నారులనే కాకుండా అనేక మందిని హత్య చేసినట్లు చెప్పాడు. అనంతరం కోర్టు అతడికి జైలు శిక్ష వేసింది.