డేటింగ్ యాప్స్లో అమ్మాయిలకు వల వేసి.. వారిపై అత్యాచారానికి పాల్పడటం న్యూజెర్సీకి చెందిన ఖలీల్ వీలర్- వీవర్(25) అలవాటు. అంతటితో ఆగకుండా వారిని క్రూరంగా హత్య చేయడం అతడి నైజం. అలా 2016లో ముగ్గురిని హత్య చేశాడు. సెప్టెంబర్- డిసెంబర్ మధ్య కాలంలో మూడు మృతదేహాలు బయటపడటం అప్పట్లో సంచలనం సృష్టించింది.
2016 ఆగస్టు 31న, 19ఏళ్ల రాబిన్ వెస్ట్ అనే యువతి.. వీలర్ వాహనం ఎక్కింది. కొన్ని గంటల తర్వాత హత్యకు గురైంది. ఆమెను వీలర్ అత్యాచారం చేసి నెవార్క్ ప్రాంతంలోని తన సొంత నివాసానికి కొద్ది దూరంలోని మరో ఇంట్లో పడేశాడు. అనంతరం ఆ ఇంటికి నిప్పంటించాడు. మృతదేహం వెస్ట్దే అని తెలుసుకోవడానికి రెండు వారాలు పట్టింది.
వెస్ట్ మృతదేహం గుర్తించిన నెల రోజుల తర్వాత మరో మహిళ అదే విధంగా హత్యకు గురైంది. జొవాన్ బ్రౌన్ను(33) హత్య చేసి, ఓ ఇంట్లో పాతిపెట్టాడు వీలర్. ఆ మృతదేహాన్ని గుర్తించేందుకు పోలీసులకు ఆరు వారాల సమయం పట్టింది.
బ్రౌన్ మరణించిన నెల రోజులకు మాంట్క్లెయిర్లోని సారా బట్లర్ అనే మహిళ అదృశ్యమైంది. అమెపైనా హత్యాచారం చేశాడు వీలర్. బ్రౌన్ మృతదేహాన్ని గుర్తించే నాలుగు రోజుల ముందు బట్లర్ మృతదేహం బయటపడింది. వీరందరినీ బట్టలతో గొంతు నులిమి హత్య చేశాడు వీలర్.
నాలుగో మహిళనూ చంపేందుకు ప్రణాళిక రచించాడు. కానీ ఆమె త్రుటిలో తప్పించుకుంది.
ఇలా బయటపడింది..
వీలరే నేరాలకు పాల్పడ్డాడని రుజువు చేసేందుకు చాలా సమయమే పట్టింది. చివరికి వీలర్కు జైలు శిక్ష పడటంలో బట్లర్ స్నేహితులు కీలక పాత్ర పోషించారు. బట్లర్ సామాజిక మాధ్యమాల ఖాతాకు యాక్సెస్ పొంది, వీలర్ గురించి తెలుసుకున్నారు. ముల్లును ముల్లుతో తీయాలని నిర్ణయించుకున్నారు. ఫేక్ అకౌంట్ను రూపొందించి, వీలర్కు వల వేశారు. అది గ్రహించలేని నిందితుడు.. వారిని కలిసేందుకు మాంట్క్లెయిర్ వెళ్లాడు. చివరికి పోలీసులకు చిక్కాడు. ఈ విషయాన్నంతటినీ జడ్జికి వివరిస్తూ.. ప్రాసిక్యూటర్.. బట్లర్ స్నేహితులను అభినందించారు.
వీలర్ వల నుంచి త్రుటిలో తప్పించుకున్న నాలుగో మహిళ కోర్టుకు వచ్చి సాక్ష్యం ఇవ్వడం వల్ల అతడు తప్పించుకోలేకపోయాడు. బలమైన ఆధారాలు ఉన్న కారణంగా అతడికి శిక్షపడింది.
అన్నివైపులా వాదనలు విన్న నెవార్క్ కోర్టు జడ్జి ఎస్ అలీ.. కిరాతకుడికి 160ఏళ్ల జైలు శిక్ష విధించారు. న్యాయమూర్తి తీర్పు విన్న బాధిత మహిళల బంధువులు కన్నీరు పెట్టుకున్నారు.
ఇంత జరిగినా.. తాను ఎలాంటి తప్పుచేయలేదని, అందరు తనను కావాలని కేసులో ఇరికించినట్టు మొరపెట్టుకున్నాడు వీలర్.
ఇదీ చూడండి:- గర్భంతో ఉన్న మహిళా పోలీస్ దారుణ హత్య
