Adipurush Nepal Ban : ప్రభాస్ రాముడి పాత్రలో భారీ అంచనాల మధ్య విడుదలైన చిత్రం 'ఆదిపురుష్'. ఈ సినిమాపై నేపాల్లో వివాదం చెలరేగింది. సీతా మాత నేపాల్లో జన్మిస్తే.. 'ఆదిపురుష్' సినిమాలో భారత్లో పుట్టినట్టు చూపించారని నేపాల్ నేతలు మండిపడ్డారు. ఈ విషయంపై నేపాల్ రాజధాని కాఠ్మండూ మేయర్ బలెన్ షా సైతం స్పందించారు. అలాంటి అభ్యంతరకర సన్నివేశాన్ని మార్చాలని, అందుకు చిత్ర బృందానికి మూడు రోజుల గడువు ఇస్తున్నామని చెప్పారు.
ఒకవేళ ఈ సన్నివేశానన్ని మార్చకపోతే కాఠ్మండూ మెట్రోపాలిటిన్ నగరంలో ఏ హిందీ సినిమా ప్రదర్శితమయ్యే అవకాశం ఉండదంటూ సోషల్ మీడియా వేదికగా ప్రకటించారు. తాజాగా అదే విషయాన్ని చెబుతూ సోషల్ మీడియాలో మరో పోస్ట్ పెట్టారు. 'ఆదిపురుష్' చిత్రంతోపాటు భారతీయ సినిమాలన్నింటిపై సోమవారం నుంచి కాఠ్మాండూలో నిషేధం విధిస్తున్నట్టు ప్రకటించారు. ఇదివరకే షెడ్యూల్ అయిన హిందీ/బాలీవుడ్ సినిమాలను థియేటర్ల నుంచి తీసేసి.. వాటి స్థానంలో హాలీవుడ్/నేపాలీ చిత్రాలను ప్రదర్శించాలని ఆదేశించారు.
''సీత జన్మించిన ప్రాంతానికి సంబంధించిన అభ్యంతరకర సందేశాన్ని తొలగించాలని ఆదిపురుష్ చిత్ర యూనిట్కు మూడు రోజుల క్రితం విజ్ఞప్తి చేశాం. నేపాల్ స్వేచ్ఛ, స్వాతంత్ర్యం, జాతీయ ప్రయోజనాలను పరిరక్షించుకోవడం, ఆత్మగౌరవాన్ని పరిరక్షించుకోవడం ప్రతి ప్రభుత్వం, ప్రభుత్వ సంస్థలు, ప్రభుత్వయేతర సంస్థలు, నేపాల్ పౌరుల బాధ్యత. కాఠ్మండూ మెట్రోపాలిటన్ సిటీ పరిధిలోని థియేటర్లలో సోమవారం నుంచి ఆదిపురుష్ సినిమాను ప్రదర్శించకుండా ఉండేలా చర్యలు తీసుకోవాలని పోలీసులకు ఇప్పటికే ఆదేశాలు జారీ చేశాం"