The Kerala Story Movie : 'ది కేరళ స్టోరీ' సినిమాపై బంగాల్ ప్రభుత్వం బ్యాన్ చేయడంపై సుప్రీంకోర్టు స్టే విధించింది. ఈ చిత్ర ప్రదర్శన అడ్డుకోవాలని చూడడం సరికాదని, అలా అనుకుంటే సినిమాలన్నీ కోర్టులకే చేరతాయని సీజేఐ జస్టిస్‌ డీవై చంద్రచూడ్‌ నేతృత్వంలోని త్రిసభ్య ధర్మాసనం వ్యాఖ్యానించింది. ఈ చిత్రానికి సెంట్రల్‌ బోర్డ్‌ ఆఫ్ ఫిల్మ్‌ సర్టిఫికేషన్- సీబీఎఫ్సీ సర్టిఫికెట్‌ జారీ చేసిందని పేర్కొంది. కాబట్టి, శాంతి భద్రతల పరిరక్షణ రాష్ట్ర ప్రభుత్వం చూసుకోవాలని ధర్మాసనం పేర్కొంది. చట్టపరమైన నిబంధనలతో సినిమాను ఆపే యత్నం చేయకూడదని బెంచ్ వ్యాఖ్యానించింది.
మరోవైపు తమిళనాడులో సినీ ప్రేక్షకులకు భద్రత కల్పించాలని సుప్రీంకోర్టు స్టాలిన్‌ ప్రభుత్వాన్ని ఆదేశించింది. 'ది కేరళ స్టోరీ' సినిమాపై ప్రత్యక్షంగా లేదా పరోక్షంగా ఎలాంటి నిషేధం లేదని తమిళనాడు ప్రభుత్వం ఇచ్చిన హామీని సుప్రీం కోర్టుపరిగణలోకి తీసుకుంది. ప్రతి సినిమా హాలులో తగిన భద్రత కల్పించాలని, సినిమా ప్రేక్షకుల భద్రతకు అవసరమైన ఏర్పాట్లు చేయాలని స్టాలిన్‌ సర్కారును సుప్రీంకోర్టు ఆదేశించింది. 'ది కేరళ స్టోరీ'కి సీబీఎఫ్సీ సర్టిఫికేషన్ మంజూరు చేయడాన్ని సవాలు చేస్తూ దాఖలైన పిటిషన్లను.. జూలై రెండో వారంలో విచారిస్తామని ధర్మాసనం పేర్కొంది. నిర్ణయం తీసుకునే ముందు చిత్రాన్ని తాము చూడాలనుకుంటున్నట్లు సర్వోన్నత న్యాయస్థానం పేర్కొంది. సినిమా చూశాకే ధ్రువీకరణ అంశంపై పిటిషన్లు విచారిస్తామని సుప్రీంకోర్టు స్పష్టం చేసింది.