Narendra Modi ISRO : జాబిల్లిపై చంద్రయాన్-3దిగిన ప్రదేశాన్ని 'శివశక్తి' అని పేరు పెట్టనున్నట్లు ప్రధాని నరేంద్ర మోదీ ప్రకటించారు. 2019లో చంద్రయాన్-2 దిగిన ప్రాంతాన్ని తిరంగా పాయింట్గా పిలవనున్నట్లు మోదీ అన్నారు. చంద్రుడిపై ల్యాండర్ దిగిన ఆగస్టు 23ను అంతరిక్ష దినోత్సవంగా జరుపుకోనున్నట్లు చెప్పారు. బెంగళూరులోని ఇస్రో కార్యాలయాన్ని సందర్శించిన ఆయన.. చంద్రయాన్-3ద్వారా అసాధారణ విజయం నమోదు చేశామని పేర్కొన్నారు. ఈ మేరకు ఇస్రో శాస్త్రవేత్తలకు సెల్యూట్‌ చేస్తున్నట్లు భావోద్వేగానికి గురయ్యారు.
మన దేశ సత్తా ఏమిటో ప్రపంచానికి చాటాం : మోదీ
PM Modi Visits ISRO : "ఇస్రో సాధించిన విజయం చాలా గర్వకారణం. చంద్రుడిపై భారత్ అడుగుపెట్టింది. అంతరిక్ష చరిత్రలో సరికొత్త చరిత్రను భారత్ సృష్టించింది. ఇప్పుడు చంద్రుడిపై భారత్ ఉంది. మన దేశ సత్తా ఏమిటో ప్రపంచానికి చాటాం. ప్రపంచంలో ఎన్నో సమస్యలకు పరిష్కారం చూపగలమని నిరూపించాం. గతంలో ఎవరూ చేయలేనిది ఇప్పుడు ఇస్రో చేసి చూపించింది" అంటూ మోదీ చెప్పుకొచ్చారు.
'ఇంటిపైనే కాదు.. చంద్రుడిపైనా మన జెండా..'
Modi Visit To Bangalore : "ఇస్రో సాధించిన విజయం ఎన్నో దేశాలకు స్ఫూర్తినిస్తుంది. ఇస్రో శాస్త్రవేత్తలు, సాంకేతికత వైపు ప్రపంచం చూస్తోంది. చంద్రయాన్-3 కృషిలో మహిళా శాస్త్రవేత్తలు ఉండటం గర్వకారణం. మన నారీ శక్తి ఏమిటో ప్రపంచానికి మరోసారి చాటాం. చంద్రయాన్-2 వైఫల్యంతో మనం వెనకడుగు వేయలేదు. మరింత పట్టుదలతో పనిచేసి చంద్రయాన్-3 విజయం సాధించాం. ఇప్పుడు ప్రతి ఇంటిపైనే కాదు.. చంద్రుడిపైనా త్రివర్ణ పతాకం ఎగురుతోంది" అని మోదీ తెలిపారు.