Vidisha Lok Sabha Polls 2024 :సార్వత్రిక ఎన్నికల మూడో విడతలో భాగంగా మధ్యప్రదేశ్‌లో 9 స్థానాలకు మే 7న పోలింగ్‌ జరగనుంది. ఇందులో అందరి దృష్టిని ఆకర్షిస్తున్న నియోజకవర్గం విదిశా. మామాజీగా పేరుగాంచిన మధ్యప్రదేశ్‌ మాజీ సీఎం శివరాజ్‌సింగ్‌ చౌహాన్ ఇక్కడ నుంచి పోటీ చేస్తుండటమే అందుకు కారణం. కాంగ్రెస్‌ నేత ప్రతాప్‌ భాను శర్మ శివరాజ్‌కు ప్రత్యర్థిగా ఉన్నారు.
20 ఏళ్ల తర్వాత!
విదిశా నియోజకవర్గం 1989 నుంచి భారతీయ జనతా పార్టీకి కంచుకోటగా ఉంది. 1989లో రాఘవ్‌ జీ ఇక్కడ నుంచి తొలిసారి బీజేపీ అభ్యర్థిగా గెలుపొందారు. ఆ తర్వాత 1991లో మాజీ ప్రధాని అటల్‌ బిహారీ వాజ్‌పేయీ విదిశా నుంచి జయకేతనం ఎగురవేశారు. 1991లో జరిగిన ఉప ఎన్నిక సహా 1996, 1998, 1999, 2004 సార్వత్రిక ఎన్నికల్లో శివరాజ్‌ సింగ్‌ చౌహాన్ ఇక్కడ నుంచి విజయఢంకా మోగించారు. 2005లో మధ్యప్రదేశ్‌ సీఎం అయిన శివరాజ్‌ సింగ్‌ చౌహాన్ విదిశా ఎంపీగా రాజీనామా చేశారు. 2009, 2014లో విదేశాంగశాఖ మాజీ మంత్రి సుష్మాస్వరాజ్‌ విదిశ నుంచి గెలుపొందారు. దాదాపు 20 ఏళ్ల సుదీర్ఘ విరామం తర్వాత శివరాజ్‌ సింగ్‌ చౌహాన్ విదిశాలో బరిలోకి దిగుతుండటంపై సర్వత్రా ఆసక్తి నెలకొంది.
చౌహాన్ను కాదని!
మధ్యప్రదేశ్‌ సీఎంగా ఉన్నప్పుడు మహిళల కోసం శివరాజ్‌ సింగ్‌ తీసుకొచ్చిన పథకాలు ఆయనకు మంచి పేరు తీసుకొచ్చాయి. ముఖ్యంగా లాడ్లీ బెహనా పథకం చాలా పాపులర్‌ అయ్యింది. 2023 నవంబర్‌లో జరిగిన మధ్యప్రదేశ్‌ అసెంబ్లీ ఎన్నికల్లో భారతీయ జనతా పార్టీ 230 స్థానాలకుగాను 163 చోట్ల విజయఢంకా మోగించింది. మరొకసారి మధ్యప్రదేశ్‌లో అధికారం చేపట్టింది. అయితే ఎన్నికల్లో విజయం తర్వాత శివరాజ్‌సింగ్‌ చౌహాన్ను కాదని మోహన్‌ యాదవ్‌ను మధ్యప్రదేశ్‌ సీఎంగా భాజపా అధిష్ఠానం నియమించింది.