ପୁଣି ଅଡୁଆରେ କେନ୍ଦ୍ରମନ୍ତ୍ରୀ ବିଶେଶ୍ୱର ଟୁଡୁ, କୁଶପୁତ୍ତଳିକା ଦାହ କଲା କୁଡୁମୀ ସମାଜ

ରାଇରଙ୍ଗପୁର: ପୁଣି ବିବାଦରେ କେନ୍ଦ୍ରମନ୍ତ୍ରୀ ବିଶେଶ୍ବର ଟୁଡୁ । କୁଡୁମୀ ସମ୍ପ୍ରଦାୟ ସମ୍ବନ୍ଧରେ କଟୁ ମନ୍ତବ୍ୟ ଦେଇ ଅଡୁଆରେ କେନ୍ଦ୍ରମନ୍ତ୍ରୀ ବିଶେଶ୍ବର ଟୁଡୁ । ଝାଡଖଣ୍ଡ ଓ ପଶ୍ଚିମବଙ୍ଗ କୁଡୁମୀ ସମ୍ପ୍ରଦାୟର ଲୋକେ ବିଭିନ୍ନ ଦାବି ନେଇ ରେଳରୋକ କରିଥିବା ବେଳେ ଏହି ଦାବି ଗୁଡ଼ିକୁ ନେଇ କୁଡୁମୀ ସାମ୍ପ୍ରଦାୟ ବିରୋଧରେ ଏକ ନିର୍ଦ୍ଦିଷ୍ଟ ବୈଦ୍ୟୁତିକ ଗଣମାଧ୍ୟମରେ ଆପତ୍ତିଜନକ ମନ୍ତବ୍ୟ ରଖିଥିଲେ କେନ୍ଦ୍ରମନ୍ତ୍ରୀ ।

ଗତ ୨୦ ତାରିଖ ଦିନ ଓଡ଼ିଶା ଝାଡଖଣ୍ଡ ଓ ପଶ୍ଚିମବଙ୍ଗ କୁଡୁମୀ ସମ୍ପ୍ରଦାୟର ଲୋକେ ବିଭିନ୍ନ ଦାବି ନେଇ ରେଳରୋକ କରିଥିଲେ । କୁଡୁମୀ ଜାତିର ଏହି ଦାବିକୁ ନେଇ କୁଡୁମୀ ସାମ୍ପ୍ରଦାୟ ବିରୁଦ୍ଧରେ ବୈଦ୍ୟୁତିକ ଗଣମାଧ୍ୟମରେ କେନ୍ଦ୍ରମନ୍ତ୍ରୀ ଦେଇଥିବା ଏକ ପ୍ରତିକ୍ରିୟାକୁ ନେଇ ଏବେ ଚାରିଆଡେ ବିରୋଧର ସ୍ବର ଉଠିଛି । ଶୁକ୍ରବାର ରାଇରଙ୍ଗପୁର ଉପଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ କୁଡୁମୀ ଜାତିର ଲୋକେ ଏକଜୁଟ ହୋଇ କେନ୍ଦ୍ରମନ୍ତ୍ରୀ ବିଶେଶ୍ବର ଟୁଡୁଙ୍କ ବିରୋଧରେ ନାରାବାଜି କରିଥିଲେ । କେନ୍ଦ୍ରମନ୍ତ୍ରୀଙ୍କ କୁଶପୁତ୍ତଳିକା ଦାହ କରିବା ସହ ବିକ୍ଷୋଭ ପ୍ରଦର୍ଶନ ମଧ୍ୟ କରିଥିଲେ ।

ଏନେଇ ଓଡିଶା ଆଦିବାସୀ କୁଡୁମୀ ସମାଜର ସଭାପତି ନିର୍ମଳ ମହାନ୍ତ କହିଛନ୍ତି, "ଗତକାଲି ଏକ ନିର୍ଦ୍ଦିଷ୍ଟ ଗଣମାଧ୍ୟମରେ କେନ୍ଦ୍ରମନ୍ତ୍ରୀ ବିଶେଶ୍ବର ଟୁଡୁ କୁଡୁମୀ ସମ୍ପ୍ରଦାୟ ସମ୍ବନ୍ଧରେ କଟୁ ମନ୍ତବ୍ୟ ଦେଇ । ଆମ ସମ୍ପ୍ରଦାୟ ଯେତେ ଆନ୍ଦୋଳନ କଲେ ମଧ୍ୟ କିଛି ପ୍ରଭାବ ପଡ଼ିବ ନାହିଁ ବୋଲି କହି ସେ ଆମକୁ ଧିକ୍କାର କରିଛନ୍ତି । ସେଥିପାଇଁ ଆମେ ତାଙ୍କ କୁଶ ପୁତ୍ତଳିକା ଦାହ କରିଛୁ । ତେବେ ଆଗାମୀ ଦିନରେ କେନ୍ଦ୍ରମନ୍ତ୍ରୀଙ୍କୁ କୌଣସି କୁଡୁମି ଗ୍ରାମକୁ ପୁରାଇ ଦେବୁନାହିଁ ବୋଲି ପଣ କରିଛୁ ।"

ଇଟିଭି ଭାରତ, ମୟୂରଭଞ୍ଜ