ଅନୁଗୋଳ: ଜିଲ୍ଲାର ପୁରୁଣାଗଡ଼, ଜୋକୁବୁ, କୁଳେଇ ଆଦି ଗାଁ ଗୁଡିକରେ ଶହ ଶହ ଏକର ଜମିରେ ଫୁଲ କୋବି ଚାଷ ହୁଏ । ଏହିସବୁ ଗାଁ ଗୁଡିକ କୋବି ଚାଷ ପାଇଁ ବେଶ ଜଣାଶୁଣା। ଫୁଲ କୋବି ଚାଷ ଶତକଡା ୯୦ ଭାଗ ଚାଷୀଙ୍କର ମୁଖ୍ୟ ଫସଲ । ବର୍ଷରେ ପ୍ରାୟ ୩ଥର କୋବି ଚାଷ କରାଯାଏ। କିନ୍ତୁ, ଡିସେମ୍ବର ମାସରେ ଅଧିକ କୋବି ଅମଳ ହୁଏ । ଫଳରେ ଚାଷୀ ଭଲ ଦୁଇ ପଇସା ଲାଭ ପାଆନ୍ତି। କିନ୍ତୁ ଚଳିତ ବର୍ଷ ସବୁ କିଛି ଧୋଇ ଦେଲା ବର୍ଷା। ବାତ୍ୟା ଜୱାଦ ପ୍ରଭାବରେ ଦୁଇ ଦିନ ଧରି ଲଗାଣ ବର୍ଷା ଯୋଗୁଁ ନଷ୍ଟ ହୋଇଗଲା ହଜାର ହଜାର କୋବି । ଆଉ ଅଳ୍ପ ଦିନ ପରେ ଚାଷୀ କୋବି କାଟି ବଜାରରେ ବିକ୍ରି କରି ଥାଅନ୍ତେ। ହେଲେ କାଟିବା ଆଗରୁ ସବୁ କୋବି ପଚି ଗଲା। ଆଉ ଯାହା ରହିଲା ସେଥିରେ ପୋକ ଲାଗିଗଲା। ତେଣୁ ସେହି କୋବି ଆଉ ଖାଇବା ଉପଯୋଗୀ ହୋଇ ନଥିବାରୁ ବିକ୍ରି ମଧ୍ୟ ହେବ ନାହିଁ। ଏଭଳି ପରିସ୍ଥିତିରେ ଚାଷୀଙ୍କ ଚିନ୍ତା ବଢି ଯାଇଛି। ହଜାର ହଜାର ଟଙ୍କା ଖର୍ଚ୍ଚ କରି ନୟାନ୍ତ ହୋଇ ପଡିଛନ୍ତି ଚାଷୀ।
ଜିଲ୍ଲାର ଏହିସବୁ ଗାଁ ଗୁଡିକ ବ୍ୟତୀତ ଅନ୍ୟ କେଉଁଠି ଏତେ ପରିମାଣର ଫୁଲ କୋବି ଚାଷ ହୁଏ ନାହିଁ। ଏ ଅଞ୍ଚଳରେ ପ୍ରାୟ ୫୦୦ ଏକରରୁ ଅଧିକ ଜମିରେ କୋବି ଚାଷ ହୁଏ। ପ୍ରତ୍ୟକ ପରିବାର କେବଳ କୋବି ଚାଷରୁ ବାର୍ଷିକ ୧ଲକ୍ଷରୁ ୫ଲକ୍ଷ ଟଙ୍କା ପର୍ଯ୍ୟନ୍ତ ଲାଭ ପାଆନ୍ତି। ଏଠାରୁ କୋବି ଜିଲ୍ଲାର ବିଭିନ୍ନ ହାଟ ବଜାର ସମେତ କଟକ, ଭୁବନେଶ୍ୱର, ଆଠଗଡ଼ ଆଦି ଅଞ୍ଚଳକୁ ଯାଏ ।