କଟକ: ସୟଦ ମୁସ୍ତାକ ଅଲ୍ଲୀ ଟ୍ରଫି ପାଇଁ ଘୋଷଣା ହେଇଛି ଓଡିଶା ଦଳ । ଏହି ଟୁର୍ଣ୍ଣାମେଣ୍ଟ ପାଇଁ ୧୬ ଜଣିଆ ଟିମ ଘୋଷଣା କରିଛି ଓଡିଶା କ୍ରିକେଟ ସଂଘ । ଗତଥର ଅପେକ୍ଷା ଏଥର ଟିମ୍ ବେଶ ସନ୍ତୁଳିତ ରହିଛି । ଅଭିଜ୍ଞ ଗୋବିନ୍ଦ ପୋଦାରଙ୍କ କାନ୍ଧରେ ରହିଛି ଅଧିନାୟକ ଭାର । ବିସିସିଆଇର ଏହି ଘରୋଇ ଟୁର୍ଣ୍ଣାମେଣ୍ଟର ଗତ ସଂସ୍କରଣରେ ଷ୍ଟାର ଖେଳାଳି ସର୍ଫରାଜ ଖାନ ଓ ତନୁଶ କୋଟିଆନଙ୍କ ଦମଦାର ପ୍ରଦର୍ଶନ ବଳରେ ପ୍ରଥମ ଥର ପାଇଁ ସୟଦ ମୁସ୍ତାକ ଅଲ୍ଲୀ ଟ୍ରଫି ହାତେଇଥିଲା ମୁମ୍ବାଇ । ଓଡ଼ିଶାର ପ୍ରଦର୍ଶନ ଏହି ସଂସ୍କରଣରେ ଉଚ୍ଚକୋଟୀର ରହିନଥିଲା ।
ତେବେ ଏଥର ସୟଦ ମୁସ୍ତାକ ଅଲ୍ଲୀ ଟ୍ରଫି ପାଇଁ ଓଡିଶା କ୍ରିକେଟ ଆସୋସିଏସନ୍ (ଓସିଏ) ଘୋଷଣା କରିଥିବା ୧୬ ଜଣିଆ ଦଳ ବେଶ ସନ୍ତୁଳିତ ରହିଛି । ଟିମ୍ ଲାଇନ ଅପ୍ ଉପରେ ନଜର ପକାଇଲେ ବ୍ୟାଟିଂ ଟପ ଅର୍ଡରରେ ସନ୍ଦୀପ ପଟ୍ଟନାୟକ, ଶାନ୍ତନୁ ମିଶ୍ର, ଶୁଭ୍ରାଂଶୁ ସେନାପତି, ଅଭିଷେକ ଯାଦବ, ସ୍ବସ୍ତିକ ସାମଲ ଓ ରାଜେଶ ଧୂପରଙ୍କ ଭଳି ଦମଦାର ଖେଳାଳି ଟିମରେ ସ୍ଥାନ ପାଇଛନ୍ତି । ବୋଲିଂ ବିଭାଗରେ ତାରିଣୀ ସ, ପ୍ରୟାସ ସିଂ, ସୁନୀଲ ରାଉଳ, ଦେବବ୍ରତ ପ୍ରଧାନ ଓ ହର୍ଷିତ ରାଥୋଡ଼ଙ୍କ ଭଳି ବୋଲର ରହିଛନ୍ତି । ଅନ୍ୟପଟେ ସୌଭାଗ୍ୟ ରାଉତ ଚଳିତବର୍ଷ ପ୍ରଥମ ଥର ପାଇଁ ସୟଦ ମୁସ୍ତାକ ଅଲ୍ଲୀ ଟ୍ରଫିରେ ନଜର ଆସିବେ ।
ତେବେ ଦୁଇ ଅଭିଜ୍ଞ ସୂର୍ଯ୍ୟକାନ୍ତ ପ୍ରଧାନ ଓ ବୀପ୍ଳବ ସାମନ୍ତରାୟଙ୍କୁ ଦଳରେ ସ୍ଥାନ ମିଳିନାହିଁ । ଏନେଇ ମଧ୍ୟ ଉତ୍ତର ରଖିଛନ୍ତି ଚୟନ କମିଟି । ଏନେଇ ଉଭୟ ତାରକା ଖେଳାଳିଙ୍କୁ ଆଗାମୀ ଦିନ ପାଇଁ ଓସିଏ ବଡ଼ ଅସ୍ତ୍ର ଭାବରେ ପ୍ରସ୍ତୁତ କରୁଛି ବୋଲି OCA ଚୟନ କମିଟି ଅଧ୍ୟକ୍ଷ ଅମୀୟ କୁମାର ରାୟ କହିଛନ୍ତି । ସେ କହିଛନ୍ତି, "କାର୍ଯ୍ୟଭାରରେ ସନ୍ତୁଳନ ପାଇଁ ଏବେ ଉଭୟଙ୍କୁ ବିଶ୍ରାମ ଦିଆଯାଇଛି । ଆଗାମୀ ମେଗା ମ୍ୟାଚ୍ରେ ଉଭୟ ଅଭିଜ୍ଞ ଖେଳାଳି ନଜର ଆସିବେ ।" ତେବେ ଏହି ସିଜିନରେ ଓଡ଼ିଶା ନିଶ୍ଚୟ ଭଲ ପ୍ରଦର୍ଶନ କରିବ ବୋଲି ଆଶା ରଖିଛି ରାଜ୍ୟ କ୍ରିକେଟ ସଂଘ । ଓଡିଶା ଏହି ସଂସ୍କରଣରେ ଆସାମ ବିପକ୍ଷରେ ପ୍ରଥମ ମ୍ୟାଚ୍ ଖେଳି ସୟଦ ମୁସ୍ତାକ ଅଲ୍ଲୀ ଟ୍ରଫି ଅଭିଯାନ ଆରମ୍ଭ କରିବ । ଏହାପରେ ହିମାଚ୍ଚଳ, ସିକିମ, ସର୍ଭିସ, ବିହାର, କେରଳ ଓ ଚଣ୍ଡୀଗଡ଼କୁ ଭେଟିବ ଓଡିଶା ।