नवी दिल्ली Terrorist Shahnawaz Arrested : दिल्ली पोलिसांच्या स्पेशल सेलनं नॅशनल इन्व्हेस्टिगेशन एजन्सी (NIA) चा मोस्ट वॉन्टेड दहशतवादी शाहनवाज उर्फ शफी उज्जामाला अटक केली आहे. एनआयएनं शाहनवाजवर तीन लाख रुपयांचं बक्षीस जाहीर केलं होतं. शाहनवाज हा दिल्लीचा रहिवासी असून तो व्यवसायानं इंजिनिअर आहे. पुणे पोलिसांच्या ताब्यातून पळून तो दिल्लीत आला होता. तो एका मोठ्या दहशतवादी घटनेची योजना आखत होता. आता विशेष कक्ष त्याची चौकशी करत आहे. एनआयए बऱ्याच दिवसांपासून त्याचा शोध घेत होती.
३-४ संशयितांना ताब्यात घेतलं : मिळालेल्या माहितीनुसार, काही दिवसांपूर्वी पोलिसांना आयएसआयएस (ISIS) चे तीन दहशतवादी दिल्लीत लपल्याची खबर मिळाली होती. या माहितीवरून शोध घेतला जात होता. या कारवाईअंतर्गत पोलिसांनी सोमवारी पहाटे शाहनवाजला अटक केली. त्याची चौकशी केल्यानंतर स्पेशल सेलनं आणखी ३-४ संशयितांना ताब्यात घेतलं. यातील एक संशयित दिल्लीबाहेरून पकडला गेला आहे. आतापर्यंत तीन दहशतवाद्यांना अटक करण्यात आली आहे.