কলিয়াবৰ, 23 জানুৱাৰী : দেওবাৰে কলিয়াবৰৰ কেলিডেন চাহ বাগিচাত আয়োজন কৰা হয় এক বিশেষ চিকিৎসাৰ শিবিৰ (Medical Camp held at Kalibor)৷ এই শিবিৰত ডাঃ ভূৱনেশ্বৰ বৰুৱা কৰ্কট চিকিৎসা প্ৰতিষ্ঠানৰ প্ৰাক্তন সঞ্চালক তথা বিশ্বৰে এগৰাকী বিশিষ্ট কৰ্কট ৰোগ বিশেষজ্ঞ চিকিৎসক ৰূপে পৰিচিত ডাঃ অমল কটকীৰ নেতৃত্বত কেইবাগৰাকী আগশাৰীৰ চিকিৎসকৰ এটি দল উপস্থিত হৈ চিকিৎসা সেৱা আগবঢ়ায় ।
গুৱাহাটী অৱষ্ট্ৰেটিকচ্ গাইন’কোল’জীকেল ছ’চাইটি আৰু আই. এম এ. দিশপুৰ শাখাৰ উদ্যোগত এমালগেমটেড প্লেন্টেছ্ন প্ৰায়ভেট্ লিমিটেডৰ উদ্যোগত কেলিডেন চাহ বাগিচাত ড৹ অঞ্জনা ফুকন মেম’ৰিয়েল ফাউণ্ডেছন, গুৱাহাটীৰ সহযোগত আয়োজন কৰা হয় এই বিশেষ চিকিৎসা শিবিৰটো (Uterus Cancer Medical Camp)।
উল্লেখযোগ্য যে, বিশ্বত প্ৰতি বছৰে প্ৰায় এক লাখ পঁচিশ হাজাৰ মহিলা এই ৰোগত আক্ৰান্ত হয় । ভাৰতত বছৰি 75 হাজাৰ মহিলা জৰায়ুৰ কৰ্কট ৰোগত আক্ৰান্ত হয় । ইয়াৰে পঞ্চাশ শতাংশ জৰায়ুৰ কৰ্কট ৰোগী মৃত্যু মুখত পৰে । ইয়াৰ কাৰণ হ’ল মহিলাসকলৰ মাজত সজাগতাৰ অভাৱ । সময় মতে জৰায়ুৰ কৰ্কট ৰোগ চিনাক্ত কৰি প্ৰতিৰোধ কৰিব পৰা যায় ।