মুখ্যমন্ত্ৰীৰ ঘোষণাৰ পাচতো অফলামুখ পাৰঘাটত নচলিল জাহাজ

মাজুলী , 10 ছেপ্তেম্বৰ : ব্ৰহ্মপুত্ৰৰ বুকুত সংঘটিত শোকাৱহ নাও দুৰ্ঘটনাৰ পাচতে মুখ্যমন্ত্ৰী ড৹ হিমন্ত বিশ্ব শৰ্মাৰ ঘোষণা মৰ্মে একক ইঞ্জিনচালিত নাও চলাচল বন্ধ হ'ল যদিও মুখ্যমন্ত্ৰীয়ে ঘোষণা কৰা মতে নচলিল জাহাজ বা মাৰ নাও ৷ বুধবাৰে বিয়লি সংঘটিত ঘটনাৰ পাচতে মাজুলীত উপস্থিত হৈ মুখ্যমন্ত্ৰী ড৹ শৰ্মাই মাজুলী আৰু যোৰহাট সংযোগী জাহাজ চলাচলৰ আশ্বাস দিছিল ৷

শুকুৰবাৰৰ পৰা কাৰ্যকৰী হোৱাকৈ মাজুলী আৰু যোৰহাট সংযোগী জাহাজৰ চলাচল হ'ব বুলি মুখ্যমন্ত্ৰীগৰাকীয়ে জানিবলৈ দিছিল ৷ সেই অনুসৰি, মুখ্যমন্ত্ৰীগৰাকীৰ নিৰ্দেশৰ পাচতে একক ইঞ্জিনচালিত নাও চলাচল বন্ধ হ'ল ঠিকেই, কিন্তু মুখ্যমন্ত্ৰীগৰাকীৰ আশ্বাসক মিছা প্ৰমাণিত কৰি শুকুৰবাৰে অফলামুখ পাৰঘাটত এখনো জাহাজ বা মাৰ নাওৰ চলাচল দেখিবলৈ পোৱা নগ'ল ৷

স্থানীয়ে লোকৰ অভিযোগ অনুসৰি অফলামুখ পাৰঘাটত যিখন মাৰ নাৱত উঠি যাত্ৰীয়ে নিশ্চিতভাৱে যাত্ৰা কৰিব পাৰিছিল, সেইখন প্ৰায় তিনিমাহ পূৰ্বে বিকল হৈছিল ৷ কিন্তু, আজি পৰ্যন্ত সেইখন ভাল কৰাৰ বাবে সংশ্লিষ্ট কৰ্তৃপক্ষই কোনো ব্যৱস্থা গ্ৰহণ নকৰিলে ৷ স্থানীয় লোকে জানিবলৈ দিয়া মতে মুখ্যমন্ত্ৰীৰ ঘোষণাৰ পাচত মাজুলী-যোৰহাট সংযোগী কমলাবাৰী ঘাটেৰে মাত্ৰ এখনহে ফেৰী চলা দেখিবলৈ পোৱা গ'ল ৷

লগতে পঢ়ক :বিশ্বনাথত উদ্ধাৰ নিমাতীঘাটত সন্ধানহীন হোৱা ইন্দ্ৰেশ্বৰ বৰাৰ বেগটো

উল্লেখ্য যে, বুধবাৰৰ ঘটনাৰ বুজ লোৱাৰ উদ্দেশ্যে প্ৰাক্তন মুখ্যমন্ত্ৰী সৰ্বানন্দ সোণোৱাল শুকুৰবাৰে মাজুলীবাসীৰ কাষত উপস্থিত হয় ৷ মাজুলীত উপস্থিত হৈ ভৱিষ্যতে এনেধৰণৰ ঘটনা প্ৰতিহত কৰাৰ বাবে কেন্দ্ৰীয় আৰু ৰাজ্য চৰকাৰৰ ফালৰ পৰা যাৱতীয় সকলো ব্যৱস্থা গ্ৰহণ কৰা হ'ব বুলি সোণোৱালে মন্তব্য কৰে ৷ অফলামুখ আৰু কমলাবাৰী পাৰঘাটৰ আন্তঃগাঁথনি উন্নয়নৰ বাবে চৰকাৰে ব্যৱস্থা গ্ৰহণ কৰিব বুলি প্ৰাক্তন মুখ্যমন্ত্ৰীগৰাকীয়ে প্ৰতিশ্ৰুতি প্ৰদান কৰে ৷

লগতে পঢ়ক :নিমাতীঘাট নাও ট্ৰেজেডী : ৰাজনীতিত নিমজ্জিত এখন দলঙৰ কাহিনী