পুনৰ আনিছে দলং নিৰ্মাণৰ সামগ্ৰী; এইবাৰ দলঙখন হ’ব গৈ নে ?

মাজুলী,24 ছেপ্তেম্বৰ : মাজুলীৰ হৈ নুঠা দলংখনে এতিয়া ৰাজ্যত ব্যাপক চৰ্চা লাভ কৰিছে ৷ বিশেষকৈ মাজুলীবাসীয়ে দলংখনক লৈ দীৰ্ঘ দিনৰ পৰা সংগ্ৰাম কৰি আহিছে ৷ উল্লেখযোগ্য যে, 2016 চনতে আধাৰ শিলা, 2021ত ভূমি পূজন আৰম্ভ হৈছিল যদিও আজি পৰ্যন্ত আৰম্ভ হোৱা নাই দলংখনৰ কাম ৷ ভূমি পূজনৰ সময়তে দলংখন নিৰ্মাণৰ বাবে যন্ত্ৰ পাতি আনিছিল ইউপি ষ্টেট বিজ কৰপৰেচন নামৰ ঠিকাদাৰী প্ৰতিষ্ঠানটোৱে ৷

কিন্তু নিৰ্বাচন পাছতে যন্ত্ৰ পাতি সমূহ ঘূৰাই লৈ যোৱাৰ পাছতে মাজুলীবাাসীৰ মাজত পুনৰ উদ্বিগ্নতাই দেখা দিছিল ৷ ইপিনে 8 ছেপ্তেম্বৰত নিমাটি ঘাটত সংঘটিত হোৱা ভয়াৱহ ফেৰী দুৰ্ঘটনাটোৰ পাছতে পুনৰ মাজুলীবাসী দলংখনক লৈ সৰব হৈ পৰা দেখা গৈছে ৷

তাৰ মাজতে বৃহস্পতিবাৰে ৩০ চিপি মিক্সাৰ কন্টেনাৰৰ পৰিৱৰ্তে ১০০ চিপি মিক্সাৰ কন্টেনাৰ এটা পুনৰ মাজুলীলৈ আনিছে নিৰ্মাণকাৰী সংস্থাই । এতিয়া সকলোৰে এটাই আশা সোনকালে আৰম্ভ হওক দলংৰ কাম ।

একেদৰে মাজুলী যোৰহাট সংযোগী দলং লৈ যাতে ৰাজনীতি নকৰি সকলোৱে সহযোগিতা কৰি নিৰ্দিষ্ট সময় শেষ কৰি মাজুলিবাসীয়ে ভুগি অহা যাতায়তী দুৰ্ভোগ নাইকীয়া কৰা আহ্বান জনাইছে সত্ৰাধিকাৰ দত্ত দেৱ গোস্বামীয়ে । তাৰ সমান্তৰালভাৱে বিভিন্ন দল সংগঠনেও অতি শীঘ্ৰে ৰাজনীতি বন্ধ কৰি দলংখন নিৰ্মাণ কৰিবলৈ দাবী জনোৱা দেখা গৈছে ৷

লগতে পঢ়কঃ তেল আৰু প্ৰাকৃতিক গেছৰ প্ৰকল্পৰ বাবে উত্তৰ-পূৰ্বাঞ্চললৈ এক লাখ কোটি টকাৰ অনুমোদন