কোকৰাঝাৰত ইউ এল বিৰ তিনি সদস্য আটক

কোকৰাঝাৰ, ২২ ছেপ্টেম্বৰ : কোকৰাঝাৰৰ উল্টাপানীৰ লুংছুং বনাঞ্চলত আৰক্ষীৰে সংঘৰ্ষত দুগৰাকীকৈ সন্দেহযুক্ত ইউএলবি সদস্য নিহত হোৱাক লৈ বিতৰ্ক অব্যাহত থকাৰ সময়তে বুধবাৰে আৰক্ষীয়ে ইউএলবি তিনি সদস্যক আটক কৰিবলৈ সক্ষম হৈছে । ইউএলবিৰ আটকাধীন কেডাৰ তথা সদস্য তিনিজন ক্ৰমে আনন্দ নাৰ্জাৰী ওৰফে আব্ৰা , সাজাৰাম ব্ৰহ্ম ওৰফে ৰমাই আৰু দৈদুন ব্ৰহ্ম ৷

কোকৰাঝাৰ জিলাৰ অতিৰিক্ত আৰক্ষী অধীক্ষক সুৰজিৎ সিং পানেছাৰে সংবাদ মাধ্যমৰ আগত সদৰী কৰা মতে, এক বিশেষ অভিযানৰ যোগে প্ৰথমে টিপকাই বগৰীবাৰীৰ দৈদুন ব্ৰহ্মক আটক কৰে । দৈদুন ব্ৰহ্মক আটক কৰাৰ লগতে তেওঁৰ ঘৰৰ পৰা এজোৰ কেমোফ্লেজ পোছাক উদ্ধাৰ কৰা হয় । সোধপোছৰ অন্তত দৈদুন ব্ৰহ্মই সকলো কথা স্বীকাৰ কৰে আৰু ইউএলবিৰ ভাবুকিপূৰ্ণ ভাইৰেল ভিডিঅ'টো ৰঙিয়া আৰু বাগছাৰ সীমান্তৱৰ্তী পাথৰকুৱেৰীত লোৱা হৈছিল বুলি স্বীকাৰ কৰে ।

ইউএলবিৰ চি-ইন-চি প্ৰিঞ্জিৎ বসুমতাৰীৰ ঘৰ গোসাইগাঁৱত আৰু তেওঁৰ বিৰুদ্ধে হত্যা-অপহৰণকে ধৰি দহটামান গোচৰ ৰজু হৈ আছে বুলি সদৰী কৰিছে সুৰজিৎ সিং পানেছাৰে । ভিডিঅ'টো লোৱাৰ সময়ত চি-ইন-চি প্ৰিঞ্জিৎ বসুমতাৰী , দুব্ৰি ব্ৰহ্ম , ফুংখা ব্ৰহ্ম , দৈদুন ব্ৰহ্ম , সুদেম ব্ৰহ্ম আদি সদস্যসকল আছিল আৰু তেওঁলোকক কৰায়ত্ব কৰিবলৈ অভিযান অব্যাহত আছে বুলি সদৰী কৰিছে কোকৰাঝাৰ জিলাৰ অতিৰিক্ত আৰক্ষী অধীক্ষক গৰাকীয়ে ।

মুঠ ১৪ টা ইউএলবিৰ কেডাৰ চিনাক্ত কৰা হৈছে আৰু সকলোকে কৰায়ত্ব কৰা হ’ব বুলি মন্তব্য কৰি আটক হোৱা আনন্দ নাৰ্জাৰী ওৰফে আব্ৰা , সাজাৰাম ব্ৰহ্ম ওৰফে ৰমাই আৰু দৈদুন ব্ৰহ্মক অধিক তথ্যৰ বাবে সোধপোছ অব্যাহত আছে বুলি সদৰী কৰিছে কোকৰাঝাৰ জিলাৰ অতিৰিক্ত আৰক্ষী অধীক্ষক গৰাকীয়ে ৷

লগতে পঢ়ক :কোকৰাঝাৰৰ এনকাউণ্টাৰৰ উচ্চপৰ্যায়ৰ ন্যায়িক তদন্ত দাবী সাংসদ ৰিপুন বৰাৰ