স্পৰ্টছ ডেস্ক, ৫ মে': বিশ্বত চলি থকা কৰ'ণা ভাইৰাছৰ আতংকৰ ফলতেই বৰ্তমান স্তব্ধ হৈ পৰিছে ক্ৰীড়াজগতৰ সকলো কাৰ্য-কলাপ । কিন্তু ইয়াৰ মাজতেই চলিত বৰ্ষত অষ্ট্ৰেলিয়াত অনুষ্ঠিত হ'বলগীয়া টি-২০ বিশ্বকাপক লৈ প্ৰতিক্ৰিয়া প্ৰকাশ কৰিছে ইংলেণ্ডৰ সীমিত অভাৰৰ অধিনায়ক ইয়ন মৰ্গানে ।
মৰ্গানে কয়, যদি নিৰ্ধাৰিত সময়-সূচী অনুসৰি চলিত বৰ্ষৰ টি-২০ বিশ্বকাপ আয়োজন কৰা হয় তেন্তে বিশ্বকাপৰ বাবে সাজু হ'বলৈ অধিক মেচ লাভ নকৰিব ইংলেণ্ড দলটোৱে । তেনেস্থলত চাব লাগিব কম সময়ৰ ভিতৰত কিমান লাভ উঠাব পৰা যাব আৰু কিমান মেচ খেলিবলৈ পোৱা যাব । এই বৰ্ষৰ ১৮ অক্টোবৰৰ পৰা অনুষ্ঠিত হোৱাৰ কথা ২০২০ বৰ্ষৰ আইচিচি টি-২০ বিশ্বকাপ ।
উল্লেখ্য যে, ইংলেণ্ড এণ্ড ৱেল্ছ ক্ৰিকেট ব'ৰ্ডে বৰ্তমানে ১ জুলাই পৰ্যন্ত ক্ৰিকেটৰ সকলো কাৰ্য-কলাপৰ ওপৰত নিষেধাজ্ঞা জাৰি কৰিছে । ফলত অষ্ট্ৰেলিয়াৰ বিৰুদ্ধে হ'বলগীয়া টি-২০, এদিনীয়া শৃংখলাতো ব্যাঘাত জন্মিছে ।
মৰ্গানে সেয়েহে বিশ্বকাপৰ বাবে সাজু হ'ব পৰাকৈ ছেপ্তেম্বৰত আয়াৰলেণ্ডৰ বিৰুদ্ধে হ'বলগীয়া এদিনীয়া শৃংখলাক টি-২০ শৃংখলালৈ ৰূপান্তৰ কৰাৰ পোষকতা কৰিছে । আবু ধাবী টি-১০ লীগৰ উদ্বোধন অনুষ্ঠানত ভিডিঅ' কনফাৰেঞ্চিঙৰ জৰিয়তে মৰ্গানে কয়, সকলোৱে বিগত মাহৰ পৰা বুজাৰ চেষ্টা কৰিছে যে কি হ'ব পাৰে আৰু কি নহয় । যদি বিশ্বকাপ নিৰ্ধাৰিত সময় সূচী অনুসৰি অনুষ্ঠিত হয় তেন্তে অতি কম সময়ৰ ভিতৰত ইংলেণ্ড দলক প্ৰস্তুত কৰি তুলিব লাগিব বুলি কয় অধিনায়কগৰাকীয়ে ।
আনহাতে ডোপিং টেষ্টত বিফল হোৱা ক্ৰিকেটাৰ এলেক্স হেল্ছৰ বিষয়ে মৰ্গানে কয়, টি-২০ বিশ্বকাপত তেওঁৰ বাবে দলত বাট খোলা আছে কেৱল খেলুৱৈগৰাকীক আত্মবিশ্বাস লাভ কৰাৰ প্ৰয়োজন আছে বুলি উল্লেখ কৰে মৰ্গানে ।
