চিটাৰা ডেস্ক, 11 আগষ্ট: ‘শক্তিমান’ খ্যাত অভিনেতা মুকেশ খান্না তেওঁৰ আলংকাৰিক বক্তব্যৰ বাবে জনাজাত ৷ তেওঁৰ মুখৰ পৰা ওলোৱা প্ৰতিটো শব্দই অনুৰাগীক আপ্লুত কৰে ৷ আনহাতে তেওঁৰ সৈতে একমত নোহোৱা সকলৰ কিন্তু ই বুকুত বিন্ধে ৷ কিন্তু কালিৰে পৰা অভিনেতাজনক অনুৰাগী, অনুসৰণকাৰীৰ পৰা আৰম্ভ কৰি বিৰোধী লৈকে সকলোৱে ছ’চিয়েল মিডিয়াত ট্ৰ’ল দিয়া আৰম্ভ কৰিছে ৷
ব্যাপকভাৱে ট্ৰ’লৰ সন্মুখীন হৈ থকা মুকেশ খান্নাৰ Bheeshm International নামেৰে আছে এটা ইউটিউব চেনেল (Mukesh khanna youtube channel) ৷ তেওঁ নিজৰ ইউটিউব চেনেলযোগে এটা ভিডিঅ’ত ছোৱালীৰ ওপৰত নেতিবাচক মন্তব্য কৰি এতিয়া বেয়াকৈ সোমাই পৰিছে বিতৰ্কত ৷ তাকে লৈ ক্ষোভত ফাটি পৰিছে ছ’চিয়েল মিডিয়া ইউজাৰ ৷
ছ’চিয়েল মিডিয়াত ভাইৰেল হৈ পৰা ভিডিঅ’ ক্লিপটোত মুকেশ খান্নাই কৈ থকা দেখা গৈছে যে, "যদি কোনো ছোৱালীয়ে ল’ৰাক কয় যে, মই তোমাৰ লগত যৌন সম্পৰ্ক স্থাপন কৰিব বিচাৰো, তেন্তে সেই ছোৱালীজনী প্ৰকৃতাৰ্থত ছোৱালী নহয়, তেওঁ ব্যৱসায় কৰিবলৈহে আগবাঢ়িছে । কাৰণ এনেকুৱা এটা নিৰ্লজ্জ কাম এখন সভ্য সমাজৰ ছোৱালীয়ে কৰিব নোৱাৰে ৷ যদি তেওঁ এনে কৰে, তেন্তে বুজিব যে তেওঁ সভ্য সমাজৰ নহয় ৷ ই তেওঁৰ ব্যৱসায় আৰু আপুনি এই ব্যৱসায়ত সোমাই নপৰিব, এনে ছোৱালীৰ পৰা আঁতৰি থাকক" (Mukesh khanna controversial statement)।