নেশ্যনেল ডেস্ক, ৪ ডিচেম্বৰ :দক্ষিণ ভাৰতৰ অন্ধ্ৰ প্ৰদেশকে ধৰি আন কেইবাখনো ৰাজ্যত ঘূৰ্ণীবতাহ 'জাৱাদ'ক লৈ আতংক (Panic over Cyclone Jawad) । অন্ধ্ৰ প্ৰদেশৰ লগতে ওড়িশাত জাৱাদক লৈ শংকিত হৈ পৰিছে ৰাইজ (Cyclone Jawad hit Odisha)। ওড়িশা চৰকাৰে শুকুৰবাৰে ঘূৰ্ণীবতাহ জাৱাদৰ সাম্ভাব্য তাণ্ডৱৰ প্ৰতি লক্ষ্য ৰাখি প্ৰায় ১৯ খন জিলাৰ বিদ্যালয় বন্ধ ঘোষণা কৰিছে । ওড়িশা উপকূলৰ লগতে পশ্চিমবংগৰ একাংশ উপকূলৰ দিশে আগবাঢ়িছে 'জাৱাদ' ৷
পৰৱৰ্তী ১২ ঘণ্টাত ওড়িশা উপকূলৰ উত্তৰ-পূৱ দিশত এই ঘূৰ্ণীবতাহে প্ৰভাৱ পেলোৱাৰ আশংকা কৰা হৈছে ৷ শনিবাৰে বিয়লি ভাগলৈ এই 'জাৱাদ' পুৰী অভিমুখে আগবঢ়াৰ সম্ভাৱনা জাৰি কৰিছে বতৰ বিজ্ঞান বিভাগে । বিভাগৰ মতে, পুৰীৰ পৰা প্ৰায় ৪৩০ কিল’মিটাৰ দক্ষিণ-পশ্চিমত আৰু ভূমিস্খলন এলেকাৰ সমীপত বতাহৰ গতিবেগ প্ৰতি ঘণ্টাত প্ৰায় ৭৫-৮৫ কিল’মিটাৰ হোৱাৰ সম্ভাৱনা আছে ৷ কোনো কোনো এলেকাত বতাহৰ গতিবেগ প্ৰতি ঘণ্টাত ৯৫ কিল’মিটাৰ পৰ্যন্ত হোৱাৰ আশংকা কৰা হৈছে ।
অৱশ্যে ধাৰণা কৰাতকৈ 'জাৱাদ'ৰ প্ৰভাৱ কিছু কম হোৱাৰো সম্ভাৱনা আছে । তথাপিও এইক্ষেত্ৰত তৎপৰ হৈছে প্ৰশাসন । আঞ্চলিক বতৰ বিজ্ঞান কেন্দ্ৰৰ তথ্য অনুসৰি গঞ্জাম, গজপতি, পুৰী আৰু জগতসিংপুৰ জিলাত জাৰি কৰা হৈছে হাই এলাৰ্ট ।