গুৱাহাটী, ১ মাৰ্চ : পুনৰ বিতৰ্কৰ আৱৰ্তত অধিবক্তা স্বাতী বিধান বৰুৱা । বৃহস্পতিবাৰে গুৱাহাটীৰ মালিগাঁৱত এজন যুৱকে আত্মহত্যা কৰাৰ ঘটনা পোহৰলৈ অহাৰ পিচতে এতিয়া নাম সাঙোৰ খাইছে স্বাতী বিধান বৰুৱাৰ ৷
মনচুৰ আলম নামৰ যুৱকজনে যোৱানিশা নিজ বাসগৃত আত্মহত্যা কৰে । এই ঘটনাৰ পিচতেই পৰিয়ালটোত হাহাকাৰ পৰিস্থিতিৰ সৃষ্টি হয় ৷ যুৱকজনৰ আত্মহত্যাক কেন্দ্ৰ কৰি শুকুৰবাৰে জালুকবাৰী আৰক্ষী থানাত উত্তপ্ত পৰিস্থিতি সৃষ্টি কৰে পৰিয়ালৰ লোকে ।
পৰিয়ালৰ অভিযোগ অনুসৰি যোৱা বিগত ডেৰ বছৰ ধৰি মনচুৰ আলম নামৰ যুৱকজন স্বাতী বিধান বৰুৱাৰ লগত কৰ্মৰত আছিল । পৰৱৰ্তী সময়ত যুৱকজনক স্বাতীয়ে বিয়া পাতিবলৈ জোৰ দিয়ে ৷ কিন্তু যুৱকজনে এই প্ৰস্তাৱ নস্যাৎ কৰি কামলৈ যোৱা বন্ধ কৰি দিয়ে ৷ এই কথা মানি ল’ব নোৱাৰি স্বাতীয়ে নিজেই যুৱকজনক বুজাই বঢ়াই পুনৰ কামলৈ লৈ যায় ৷
পৰিয়ালৰ ভাষ্য অনুসৰি পৰৱৰ্তী সময়ত স্বাতীয়ে যুৱকজনক কামৰ গইনা লৈ দিল্লীলৈ লৈ যায় ৷ হোটেলত নিশা স্বাতীয়ে যুৱকজনক কল্ড ড্ৰিংকছৰ লগত নিচাযুক্ত দ্ৰব্য মিহলাই শাৰীৰিক সম্পৰ্ক স্থাপন কৰে বুলি পৰিয়ালৰ লোকে অভিযোগ কৰে ৷ তাৰ পিচতেই স্বাতীয়ে যুৱকজনক তেওঁ অন্তঃসত্বা হৈছে বুলি লৈ বিয়া পাতিবলৈ জোৰ দিয়ে ৷