গুৱাহাটী, ২৮ জানুৱাৰী : আলফা(স্বা)ত আৰক্ষীৰ চোৰাংচোৱা সন্দৰ্ভত প্ৰকাশ পোৱা বাতৰি ভুৱা বুলি স্পষ্টীকৰণ দিছে আৰক্ষীয়ে ৷ দেওবাৰে এক ভিডিঅ’যোগে আলফা(স্বা)এ প্ৰকাশ কৰা যুৱকজন আৰক্ষী জোৱান নহয় বুলি প্ৰকাশ কৰিছে এক প্ৰেছ বিজ্ঞপ্তিৰ জৰিয়তে ৷
অসম আৰক্ষীৰ মুখ্য জনসম্পৰ্কৰক্ষী বিষয়াই প্ৰকাশ কৰা প্ৰেছ বিজ্ঞপ্তিখন উল্লেখ কৰে, ‘‘আলফা (স্বা)ৰ কেম্পত বন্দী আৰক্ষীৰ চোৰাংচোৱা’ শীৰ্ষক এক বাতৰি কিছুসংখ্যক বৈদ্যুতিন মাধ্যমত প্ৰচাৰিত হোৱা অসম আৰক্ষীৰ মুখ্য কাৰ্যালয়ৰ দৃষ্টিগোচৰ হৈছে । বাতৰিটোত মানস বৰগোঁহাই নামৰ আলফা (স্বা) সদস্য এজনক অসম আৰক্ষীৰ বিশেষ শাখাৰ বিষয়া বুলি উল্লেখ কৰা হৈছে ।’’
ইয়াৰোপৰি প্ৰেছ বিজ্ঞপ্তটোত উল্লেখ কৰা হৈছে, ‘‘ উক্ত বক্তব্য সম্পূর্ণ মিথ্যা । মানস বৰগোঁহাই নামৰ কোনো ব্যক্তিক অসম আৰক্ষীৰ বিশেষ শাখাত ২০২১ বৰ্ষত মকৰল কৰা হোৱা নাই আৰু অসম আৰক্ষীৰ ফালৰ পৰা তেনে কোনো ব্যক্তিক আলফা (স্বা) কেম্পলৈ পঠোৱা হোৱা নাই । অসম আৰক্ষীৰ সম্পৰ্কে বাতৰিটোত পৰিৱেশিত সকলোবোৰ কথা সম্পূর্ণ মিছা, বিভ্ৰান্তিকৰ আৰু উদ্দেশ্যপ্ৰণোদিত ।’’