গোৱালপাৰা, 17 এপ্ৰিল: মেঘালয়ৰ অগাছিত সংঘটিত হৈছে এক চাঞ্চল্যকৰ ঘটনা ৷ অসমৰ পৰা মেঘালয়ৰ পূব গাৰো পাহাৰলৈ যোৱা তিনিগৰাকী যুৱকৰ অগ্নিদদ্ধ মৃতদেহ গাঁতত পুতি থোৱা অৱস্থাত উদ্ধাৰ হৈছে অগাছি নামৰ অঞ্চলটোত ৷ লগতে উদ্ধাৰ হৈছে জ্বলাই দিয়া গাড়ীখন ।
গোৱালপাৰা জিলাৰ দলগোমাৰ পৰা হত্যাৰ বলি হোৱা তিনিওগৰাকী যুৱক মেঘালয়ৰ পূৱ গাৰো পাহাৰলৈ ব্যৱসায়িক সূত্ৰে গৈছিল বুলি জানিব পৰা গৈছে ৷ মঙলবাৰেও যুৱক তিনিগৰাকীয়ে এখন ছুইফট ডিজায়াৰ বাহনৰে তালৈ গৈছিল ৷ ব্যৱসায়িক সূত্ৰে তেওঁলোক প্ৰায়েই ঠাইখনলৈ গৈছিল বুলি সদৰী হৈছে ৷
হত্যাৰ বলি হোৱা যুৱকৰ তিনিজন জমিৰ উদ্দিন(৩৫), নুৰ মহম্মদ(৩৬) আৰু জাহিদুল ইছলাম (২৬) বুলি চিনাক্ত কৰা হৈছে ৷ ইয়াৰে নুৰ মহম্মদ আছিল গাড়ীখনৰ গৰাকী । গোৱালপাৰাৰ দলগোমাত ঘৰ নিহত জমিৰ আলী আৰু নুৰ মহম্মদৰ। আনহাতে তৃতীয়টো মৃতদেহ কৃষ্ণাই খাৰধৰাৰ জাহিদুল ইছলামৰ বুলি চিনাক্ত হৈছে ।
আত্মীয়ৰ বিৱৰণ অনুসৰি সোমবাৰে নিশা জমিৰ উদ্দিনৰ AS ০১ EY ৫২৪৭ নম্বৰৰ গাড়ীখনেৰে মেঘালয়লৈ গৈছিল যুৱক তিনিজন । কিন্তু মঙলবাৰৰ দিনৰ ভাগৰ পৰাই মোবাইল বন্ধ পোৱা যায় তিনিওজনৰে । সেইদিনা নিশা পৰ্যন্ত তেওঁলোক উভতি নহাত মঙলবাৰে সন্ধিয়া মটিয়া থানাত নিৰুদ্দেশৰ গোচৰ তৰিছিল নুৰ মহম্মদৰ পৰিয়ালে। গাড়ীখনত থকা জিপিএছৰ জৰিয়তে ঘটনাস্থলীৰ বিষয়ে জানিব পাৰে পৰিয়াল আৰু আৰক্ষীয়ে। তাৰ পিচত মেঘালয় আৰক্ষীৰ সহায়ত প্ৰথমে জ্বলি প্ৰায় ছাঁই হৈ যোৱা গাড়ীখনৰ সন্ধান লাভ কৰে ৷ পিচত গাড়ীৰ কাষতেই এটা গাঁতত পুতি থোৱা অৱস্থাত জ্বলাই দিয়া মৃতদেহ তিনিটা উদ্ধাৰ কৰা হয় ।