যোৰহাট, 16 এপ্ৰিল: "নাচৰ পিছত মুখ্যমন্ত্ৰীয়ে গান গাবলৈ আৰম্ভ কৰিব । চৰকাৰে ফৰ্মৰ ৰাজনীতিৰ জৰিয়তে মহিলাসকলক হাৰাশাস্তি কৰিলে ৷ সেয়ে বিজেপিক শিক্ষা দিবলৈ সাজু মহিলাসকল ৷" আজি যোৰহাটৰ জাতীয় ভৱনত এই মন্তব্য আগবঢ়ায় কংগ্ৰেছ প্ৰাৰ্থী গৌৰৱ গগৈয়ে ৷ সোমবাৰে যোৰহাটত সন্মিলিত নাগৰিক মঞ্চৰ উদ্যোগত আয়োজন কৰা হয় যোৰহাট বিভিন্ন ক্ষেত্ৰৰ লগত জড়িত বিভিন্ন ব্যক্তিৰ সৈতে যোৰহাট লোকসভা সমষ্টিৰ কংগ্ৰেছ প্ৰাৰ্থী গৌৰৱ গগৈৰ সৈতে অন্তৰংগ আলাপ অনুষ্ঠান ৷
এই অনুষ্ঠানত অংশগ্ৰহণ কৰি কংগ্ৰেছ নেতা গৌৰৱ গগৈয়ে কয়, "এইখন চৰকাৰে ফৰ্মৰ ৰাজনীতিৰ জৰিয়তে অসমৰ মহিলাসকলক হাৰশাস্তি কৰিলে, মহিলাসকলক ফৰ্মৰ জৰিয়তে এইখন চৰকাৰে যিদৰে দৌৰালে, তাৰ উচিত শিক্ষা দিবলৈ সম্পূৰ্ণৰূপে সাজু মহিলাসকল । মহিলাসকলক কৰা অন্যায় আৰু প্ৰৱঞ্চনাৰ বিৰুদ্ধে বিজেপিক কাণ চেপা দিবলৈ সাজু হৈছে ৰাজ্যৰ মহিলাসকল ৷"
অত্যাৱশকীয় সামগ্ৰীৰ জুই চাই দাম বৃদ্ধিয়ে ঘৰ এখন নিয়াৰিকৈ চলাই নিয়াৰ ক্ষেত্ৰত যিদৰে এই চৰকাৰখনে প্ৰত্যাহ্বানৰ সৃষ্টি কৰিছে, সেই দিশলৈ লক্ষ্য ৰাখি মহিলাসকলে বিজেপি বিপক্ষে অৰ্থাৎ কংগ্ৰেছ দলক ভোট দিব বুলি দাবী কৰে ৷