গুৱাহাটী, ৮ এপ্ৰিল:লোকসভা নিৰ্বাচনৰ প্ৰাকমুহূৰ্তত মুখ্যমন্ত্ৰী হিমন্ত বিশ্ব শৰ্মালৈ মুকলি প্ৰত্যাহ্বান জনাইছে অসম প্ৰদেশ কংগ্ৰেছৰ সভাপতি ভূপেন বৰাই । গুৱাহাটীত সোমবাৰে সাংবাদিকক সম্বোধন কৰি ভূপেন বৰাই মুখ্যমন্ত্ৰী হিমন্ত বিশ্ব শৰ্মালৈ মুকলি প্ৰত্যাহ্বান জনায় কয়, "মুখ্যমন্ত্ৰীয়ে এটা নিজৰ পচন্দৰ টি ভি চেনেলত মোৰ সৈতে মুখামুখিকৈ বিতৰ্কত বহক । মই অসমৰ নিবনুৱা সমস্যা, গুৱাহাটীৰ কৃত্ৰিম বান, খোৱাপানীৰ সমস্যা, অসম চুক্তি ৰূপায়ণ কৰা আৰু অসমৰ ছয় জনগোষ্ঠীৰ জনজাতিকৰণ আদি কেতবোৰ প্ৰশ্ন মুখ্যমন্ত্ৰীক সুধিম । মুখ্যমন্ত্ৰীয়ে তাৰ উত্তৰ দিব লাগিব ।"
তেওঁ লগতে কয়, "যদি আপুনি এই প্ৰশ্নবোৰৰ উত্তৰ দিব পাৰে, অসমৰ ৰাইজ সন্তুষ্ট হয়, তেতিয়া হ’লে আপোনালোকৰে ভাল হ’ব ৷ বিহুৰ আগত কৰ্মচাৰীক দৰ্মহা দিব নোৱাৰি ঋণ ল’ব বিচাৰিছে ৷ যদি ঋণ নাপায়, তেতিয়া হ’লেতো আপুনি কৰ্মচাৰীক দৰ্মহা দিব নোৱাৰিব ৷ অসমৰ বিত্তীয় সংকটৰ কথা ৰাইজৰ পৰা কিমান লুকুৱাব ৷" কিন্তু মুখ্যমন্ত্ৰীয়ে অসমৰ মূল সমস্যাবোৰক আঁতৰাই ৰাখি মুখ্যমন্ত্ৰী আৰু ভূপেন বৰাৰ মাজত এখন যুঁজৰ সৃষ্টি কৰিছে বুলি বৰাই উল্লেখ কৰে । আচলতে মৌলিক সমস্যা লৈ বিতৰ্ক হ'লে বিজেপি গাঁৱলৈ নিৰ্বাচনী প্ৰচাৰৰ বাবে যাব নোৱাৰিব বুলি প্ৰদেশ কংগ্ৰেছৰ সভাপতিগৰাকীয়ে দলটোক কটাক্ষ কৰে ।