নেশ্যনেল ডেস্ক,৫ এপ্ৰিল :ভাৰত চৰকাৰে দেশৰ ভিতৰত চিপ (চিপ হৈছে অৰ্ধপৰিবাহী উপাদান সামগ্ৰীৰ সাধাৰণ শব্দ) উৎপাদনৰ লক্ষ্যৰে মুঠ ২১ বিলিয়ন ডলাৰ বিনিয়োগৰ প্ৰস্তাৱবোৰ পৰ্যালোচনা কৰি আছে । প্ৰস্তাৱবোৰে ঘৰুৱা গোট আৰু আন্তৰ্জাতিক প্ৰতিদ্বন্দ্বী দুয়োৰে পৰা বিভিন্ন উদ্যোগ সামৰি লৈছে ।
ইজৰাইলৰ টাৱাৰ ছেমিকণ্ডাক্টৰ লিমিটেডে ৯ বিলিয়ন ডলাৰৰ এক গুৰুত্বপূৰ্ণ প্ৰস্তাৱ আগবঢ়াইছে । তেওঁলোকে গুজৰাটত এটা ছেমিকণ্ডাক্টৰ কাৰখানা স্থাপন কৰিব বিচাৰিছে । একেদৰে, টাটা গ্ৰুপে একেটা অঞ্চলতে এটা চিপ (Chip) নিৰ্মাণ গোটৰ বাবে ৮ বিলিয়ন ডলাৰৰ প্ৰস্তাৱ দিছে । ছেমিকণ্ডাক্টৰ খণ্ডটো ভূ-ৰাজনৈতিক প্ৰতিযোগিতাৰ এক গুৰুত্বপূৰ্ণ ক্ষেত্ৰলৈ বিকশিত হৈছে । কিয়নো আমেৰিকা, জাপান আৰু চীনকে ধৰি বিভিন্ন ৰাষ্ট্ৰই তেওঁলোকৰ ঘৰুৱা চিপ উদ্যোগবোৰ শক্তিশালী কৰিবলৈ প্ৰতিদ্বন্দ্বিতা কৰিছে ।
প্ৰধানমন্ত্ৰী নৰেন্দ্ৰ মোদীৰ চৰকাৰে ভাৰতক এক বিশ্বব্যাপী উৎপাদন কেন্দ্ৰ হিচাপে গঢ়ি তুলিবলৈ আগ্ৰহী । ইফালে ঘৰুৱা উদ্যোগসমূহক সুযোগ দিয়াৰ লগতে আন্তৰ্জাতিক চিপমেকাৰসকলকো আকৰ্ষিত কৰাৰ বাবে প্ৰেৰণা যোগাই আহিছে ।
এই প্ৰচেষ্টাৰ লক্ষ্য হৈছে ব্যয়বহুল আমদানিৰ ওপৰত নিৰ্ভৰশীলতা হ্ৰাস কৰা আৰু স্মাৰ্টফোন এচেম্বলীৰ দৰে উদ্যোগত ভাৰতক আগুৱাই লৈ যোৱা । চিপ(Chip) নিৰ্মাণৰ বাবে ভাৰতৰ উদগনিমূলক পৰিকল্পনাৰ অধীনত, চৰকাৰে অনুমোদিত প্ৰকল্পবোৰৰ ব্যয়ৰ আধা ৰাজসাহায্য দিবলৈ সাজু হৈছে ৷ যাৰ প্ৰাৰম্ভিক আৱণ্টন এই উদ্দেশ্যৰ বাবে নিৰ্ধাৰিত কৰা হৈছে ১০ বিলিয়ন ডলাৰ । অতীতৰ বিফলতা, যেনে হাই-প্ৰফাইল অংশীদাৰিত্বৰ পতনৰ স্বত্বেও, ভাৰতে ছেমিকণ্ডাক্টৰ আত্মনিৰ্ভৰশীলতাৰ বাবে দৃঢ় হৈ আছে ।
লক্ষণীয়ভাৱে, বিত্তীয় উদগনিবোৰে ইতিমধ্যে এপল আৰু গুগলৰ দৰে প্ৰযুক্তিৰ প্ৰভাৱশালী গোটৰ পৰা বিনিয়োগ আনিছে ৷ যাৰ ফলত ভাৰতৰ ইলেক্ট্ৰনিক্স উৎপাদন পৰিস্থিতিতন্ত্ৰৰ বিকাশ উৎসাহিত হৈছে ।
এপল ইংকে ভাৰতৰ পৰা বিলিয়ন ডলাৰ মূল্যৰ আইফোন নিৰ্মাণ আৰু ৰপ্তানি কৰি আছে ৷ আনহাতে, এলফাবেট ইনকৰ গুগলে এই বছৰ দেশত ফোন নিৰ্মাণ কৰাৰ প্ৰস্তুতি চলাই আছে । ছেমিকণ্ডাক্টৰ পুঁজিয়ে আমেৰিকাৰ মেম'ৰি (memory) নিৰ্মাতা মাইক্ৰন টেকন'লজী ইংকক গুজৰাটত ২.৭৫ বিলিয়ন ডলাৰৰ এচেম্বলী আৰু পৰীক্ষাৰ সুবিধা স্থাপন কৰাত সহায় কৰিছিল । সেই ৰাজ্যৰ ধোলেৰা চহৰখন এক সম্ভাৱ্য চিপ নিৰ্মাণ কেন্দ্ৰ হিচাপে বিকশিত কৰা হৈছে ।
টাৱাৰ ছেমিকণ্ডাক্টৰে প্ৰতি মাহে ৮০,০০০ চিলিকন ৱেফাৰ উৎপাদন কৰাৰ বাবে এক দশকত ইয়াৰ প্ৰস্তাৱিত প্ৰকল্পটো স্কেল কৰাৰ কল্পনা কৰিছে ৷ যি এক মুখ্য ছেমিকণ্ডাক্টৰ কোম্পানীৰ দ্বাৰা পৰিচালিত ভাৰতৰ প্ৰথম উৎপাদন গোট হিচাপে এক গুৰুত্বপূৰ্ণ মাইলৰ খুঁটি হিচাপে চিহ্নিত কৰিব পাৰে । একেদৰে, টাটা গ্ৰুপৰ উদ্যোগটো পাৱাৰ চিপ ছেমিকণ্ডাক্টৰ মেনুফেকচাৰিং কৰ্পৰ সহযোগত হ'ব বুলি আশা কৰা হৈছে ।
দুয়োটা প্ৰকল্পই উপভোক্তা ইলেক্ট্ৰনিকছ, অটোমোটিভ আৰু প্ৰতিৰক্ষাকে ধৰি বিভিন্ন ক্ষেত্ৰত বহুলভাৱে ব্যৱহৃত পৰিপক্ক চিপ নিৰ্মাণৰ ওপৰত গুৰুত্ব আৰোপ কৰে । একে সময়তে, টাটা গ্ৰুপে পূৱ ভাৰতত ৩ বিলিয়ন ডলাৰৰ চিপ-পেকেজিং প্ৰকল্প স্থাপনৰ ওপৰতো দৃষ্টি ৰাখিছে । এই পদক্ষেপবোৰ উচ্চ-প্ৰযুক্তিখণ্ডত বিনিয়োগৰ বৈচিত্ৰতা আনিবলৈ টাটাৰ বহল ৰণনীতিৰ সৈতে সংগতি ৰাখিছে ।
একে সময়তে, জাপানৰ ৰেনেচাছ ইলেক্ট্ৰনিক্স কৰ্পে ভাৰতৰ বৰ্ধিত চিপ-পেকেজিং শাখাত সহযোগিতাৰ সুযোগ অন্বেষণ কৰি আছে । সকলোবোৰ চিপ প্ৰস্তাৱৰ বাবে কেন্দ্ৰীয় কেবিনেটৰ সন্মতিৰ প্ৰয়োজন, যি অহা কেইসপ্তাহমানৰ ভিতৰত হ'ব পাৰে । এই ৰাজসাহায্যৰ বাবে যোগ্যতা অৰ্জন কৰিবলৈ আবেদনকাৰীসকলে তেওঁলোকৰ লক্ষ্য বজাৰৰ সৈতে প্ৰযুক্তিগত অংশীদাৰিত্ব, বিত্তীয় ব্যৱস্থা আৰু লগতে তেওঁলোকে কৰিব লগা ছেমিকণ্ডাক্টৰৰ প্ৰকাৰ আৰু নিৰ্দিষ্টকৰণকে ধৰি বিস্তৃত বিৱৰণ প্ৰদান কৰিব লাগিব ।
বিংশ শতিকা তেলৰ শতিকা আছিল আৰু একবিংশ শতিকা হৈছে চিপছৰ শতিকা । আজিৰ চিপবোৰ গাড়ী, সঁজুলি, স্মাৰ্টফোন, ইলেক্ট্ৰনিক গেজেট, গেমিং কনচৌল আৰু আনকি অস্ত্ৰ-শস্ত্ৰতো ব্যৱহাৰ কৰা হয় । ছেমিকণ্ডাক্টৰ অবিহনে আধুনিক জীৱন সম্ভৱ নহয় । আজি চিপ বজাৰ প্ৰায় ৫৭০ বিলিয়ন ডলাৰ আৰু দশকটোৰ শেষলৈ, ই এক ট্ৰিলিয়ন ডলাৰ হ'ব বুলি অনুমান কৰা হৈছে । সেয়েহে প্ৰতিখন দেশে চিপ যোগানৰ ব্যৱসায়ত নিজকে অন্তৰ্ভুক্ত কৰিব বিচাৰে ।
বিশ্বব্যাপী চিপ বজাৰক তিনিটা মুখ্য খণ্ডত বিভক্ত কৰিব পাৰি: ডিজাইনিং, মেনুফেকচাৰিং আৰু এচেম্বলিং । সাধাৰণতে, এই প্ৰক্ৰিয়াটো সমগ্ৰ বিশ্বতে বিয়পি আছে । চিপ ডিজাইনিঙৰ নেতৃত্ব আমেৰিকাৰ সৈতে আছে । আমেৰিকাৰ প্ৰতিষ্ঠানসমূহে বৰ্তমান বিশ্বব্যাপী চিপ ডিজাইন বিক্ৰীৰ ৪৬ শতাংশ আৰু চিপ ডিজাইন ছফ্টৱেৰ আৰু লাইচেঞ্চ বিক্ৰীৰ এক উল্লেখযোগ্য ৭২ শতাংশ দখল কৰি আছে ।
এতিয়া এই ডিজাইনবোৰ টাইৱানৰ দৰে পৃথিৱীৰ আন ঠাইত নিৰ্মাণ কৰা হয় যি চিপ নিৰ্মাণ বজাৰৰ ৫০ শতাংশলৈকে হয়, দ্বিতীয়টো দক্ষিণ কোৰিয়া (চিপ নিৰ্মাণৰ ১৭ শতাংশ), তাৰ পিচত আছে জাপান আৰু চীন । চীন, টাইৱান আৰু দক্ষিণ কোৰিয়াৰ দৰে দেশত এই চিপবোৰ এচেম্বলিং কৰা হয় । ভাৰতৰ তুলনাত অধিক কাৰখানা আৰু অধিক এচেম্বলিং গোটৰ সৈতে চীন এই ক্ষেত্ৰত আগবাঢ়ি আছে ।