World Photography Day 2023 : మాదాపూర్​లో ఫొటో ఎగ్జిబిషన్​.. ఆ అద్భుతాలపై మీరూ ఓ లుక్కేయండి..

World Photography Day 2023 : ఓ మనిషి చనిపోయినా.. అతని మరణానంతరం కూడా స్మరించుకోవడానికి ఉపయోగపడేవి ఒక్క ఫొటోలు మాత్రమే. ఇప్పుడంటే ప్రతి ఒక్కరి దగ్గర సెల్​ఫోన్​లు వచ్చేశాయ్​ కానీ.. మన ముందు తరం వారు ఫొటోలతోనే జ్ఞాపకాలు నెమరవేసుకునే వారు. అప్పటికీ ఇప్పటికీ వన్నె తగ్గనిది ఫొటో ఒక్కటే. ఈ మధ్యకాలంలో రకరకాల ప్రదేశాల్లో ఫొటోలు తీస్తూ.. ఎప్పటికప్పుడు కొత్తదనాన్ని తీసుకువస్తున్నారు మన ఫొటో గ్రాఫర్స్​. నేడు అంతర్జాతీయ ఫొటోగ్రాఫర్​ డే సందర్భంగా హైదరాబాద్​లోని మాదాపూర్​లో ఫొటో వాక్​ హైదరాబాద్​ ఆధ్వర్యంలో ఫొటో ఎగ్జిబిషన్​ నిర్వహించారు.

ఈ కార్యక్రమానికి ముఖ్య అతిథిగా ప్రముఖ సినిమాటోగ్రాఫర్, డైరెక్టర్ హరి అనుమోలు హాజరై.. ఫొటో ఎగ్జిబిషన్​ను ప్రారంభించారు. ఫొటో వాకర్ హైదరాబాద్ సభ్యులు తీసిన ఫొటోలను తిలకించారు. నగరంలోని పలు ప్రాంతాల్లో తీసిన ఫొటోలు ఈ ప్రదర్శనలో ఉంచారు. ఈ సందర్భంగా ఆయన మాట్లాడుతూ ఫొటో గ్రాఫర్లు తమ ప్రతిభను వెలికి తీసి ఆ మధుర అనుభూతులను ప్రేక్షకులకు అందిస్తున్నారన్నారు. గతేడాది ఫొటో వాక్​ హైదరాబాద్​ పేరుతో ఒక టీంను ఏర్పాటు చేసుకొని అనుభవాలను పంచుకుంటూ విధులు నిర్వహిస్తున్నామని అసోసియేషన్​ సభ్యులు తెలిపారు.