కోడిని చంపిన వారిపై చర్యలు తీసుకోవాలని కోరుతూ ఓ వ్యక్తి పోలీసులకు ఫిర్యాదు చేశాడు. ఈ ఘటన రాజన్న సిరిసిల్ల జిల్లా చందుర్తి మండలంలో జరిగింది. బండపల్లికి చెందిన గశికంటి రాజు తన కోడిని ట్రాక్టర్తో గుద్ది చంపారని ఠాణాలో ఫిర్యాదు చేశాడు.
ఇంతకు ముందు నాకు 20 వరకు కోళ్లు ఉండేవి. మా ఊళ్లో ఇసుక ట్రాక్టర్లు ఎక్కువగా తిరుగుతున్నాయి. చాలా కోళ్లు ట్రాక్టర్ల కిందపడి చనిపోయాయి. ఇది కూడా అలానే చనిపోయింది. ఉన్న ఒక్కటి కూడా పోయిందని.. ఆవేదనకు గురైన నేను ఈ కోడిని తీసుకుని ట్రాక్టర్ డ్రైవర్ ఇంటికెళ్లాను. వాళ్లు దురుసుగా మాట్లాడారు. కోడిని పట్టుకుని పోలీస్ స్టేషన్కు వచ్చాను. నాకు న్యాయం జరగాలని కోరుతున్నాను.
-గశికంటి రాజు, కోడి యజమాని
తన కోడిని చంపిన ట్రాక్టర్ డ్రైవర్పై కేసు నమోదు చేసుకోవాలని కోరాడు. ఎంతో ప్రేమగా పెంచుకుంటున్న కోడిని చంపేశారని.. అందుకే పోలీస్ స్టేషన్ మెట్లు ఎక్కానని రాజు తెలిపాడు. బాధితుడి ఫిర్యాదుతో పోలీసులు అవాక్కయ్యారు. అయితే కోడిని కోల్పోయిన రాజుకు ఏవిధంగా న్యాయం జరుగుతుందో వేచి చూడాల్సిందే.
ఇదీ చూడండి: కన్నతండ్రిపై తనయుడు వేట కొడవలితో దాడి
