బ్రెయిన్ స్ట్రోక్తో మంచానికే పరిమితమైన భర్తకు అన్నీతానై... అమ్మలా మారింది ఓ గృహిణి. నల్గొండ జిల్లా మిర్యాలగూడ పట్టణానికి చెందిన అరుంధతి, చెన్నయ్య ప్రేమ వివాహం చేసుకున్నారు. వారికి ఆరేళ్ల కుమారుడు అధ్యాయన్ ఉన్నాడు.
బ్రెయిన్ స్ట్రోక్...
ఉన్నత చదువులు చదివిన చెన్నయ్య... హైదరాబాద్లోని ఓ బీఈడీ కళాశాలలో ప్రిన్సిపల్గా పనిచేస్తున్న సమయంలో 2017 ఫిబ్రవరి 7న తరగతి గదిలో బ్రెయిన్ స్ట్రోక్తో ఒక్కసారిగా కుప్పకూలిపోయాడు. అప్పట్నుంచి మంచానికే పరిమితమయ్యాడు. డబ్బు ఖర్చు చేస్తే మామూలు స్థితికి వచ్చే అవకాశం ఉందని వైద్యులు తెలిపారు.
నెలకు రూ. లక్షా 30వేలు...
కుటుంబ సభ్యుల సహకారంతో సుమారు రూ. 20 లక్షలకు పైగానే చికిత్స కోసం ఖర్చు చేసినప్పటికీ ఎలాంటి ప్రయోజనం లేదు. సంవత్సరం పాటు క్రమం తప్పకుండా చికిత్స అందిస్తే తన భర్త మామూలు మనిషి అవుతారని... అందుకు నెలకు రూ. లక్షా 30వేలు ఖర్చవుతుందని వైద్యులు చెప్పినట్లు అరుంధతి తెలిపారు.
సాయం చేయండి...
కరోనా ప్రభావం వల్ల కుటుంబం గడవడం కష్టంగా ఉందని.. కొడుకుని కూడా చదివించే స్థితిలో తాను లేనని అరుంధతి వాపోయారు. తన పరిస్థితిని చూసైనా... అధికారులు స్పందించి ప్రభుత్వ పరంగా సాయం అందించాలని కోరుతున్నారు.
ఇప్పటికే మందుల కోసం నెలకు రూ. 15 వేలు ఖర్చు చేస్తున్నట్లు ఆమె వివరించారు. బీఎస్సీ కంప్యూటర్ పూర్తి చేసిన తనకు తగిన ఉద్యోగం అవకాశం కల్పించి ఆదుకోవాలని అరుంధతి కోరుతున్నారు. ఉపాధి కల్పిస్తే తన భర్తను తానే కాపాడుకుంటానని ఆత్మవిశ్వాసంతో చెబుతోంది.
ఇదీ చూడండి:భారత్ బంద్కు కేసీఆర్ సంపూర్ణ మద్దతు
