మహబూబాబాద్ మండలం వేమునూరు గ్రామంలో ప్రాథమిక సహకార సంఘం ఆధ్వర్యంలో ఏర్పాటు చేసిన ధాన్యం కొనుగోలు కేంద్రాన్ని సీఈవో రజిత పరిశీలించారు. ధాన్యం కాంటా వేశాక నిర్వాహకులు మోసాలకు పాల్పడుతున్నారని రైతన్నలు ఆరోపించారు. ధాన్యం కొనుగోలు చేశాక బస్తాల తూకం తక్కువగా వస్తున్నాయని అన్నదాతలు వాపోయారు.
నిర్వాహకులు మాత్రం తేమ కారణంగా మిల్లర్లు దిగుమతి చేసుకోవడం లేదని చెబుతున్నారు. దీంతో రెండు విధాలుగా తాము నష్టపోతున్నామని రైతులు అధికారులకు ఫిర్యాదు చేశారు. విషయం తెలుసుకున్న భాజపా శ్రేణులు కొనుగోలు కేంద్రానికి వచ్చి ఆరా తీశారు. ఈ విషయాన్ని అధికారులకు తెలియజేసి, రైతులకు న్యాయం చేస్తానని రజిత హామీ ఇచ్చారు. అనంతరం కొనుగోలు కేంద్రం నిర్వాహకుడిని తొలగించారు.
