ఏకధాటిగా విద్యుత్ ఇవ్వకపోవడంతో వచ్చే కరెంటుతో తడిసిన పొలాలే మళ్లీ తడుస్తున్నాయి తప్ప.. పంటలకు నీళ్లు అందడం లేదు. యాసంగి సీజన్‌లో పొలాలు ఎండిపోతున్నాయి. ఇష్టం వచ్చినప్పుడు కరెంట్ ఇవ్వడంతో పొలాల దగ్గరే రైతులు 24 గంటలూ పడిగాపులు కాస్తున్నారు. ఉమ్మడి కరీంనగర్ జిల్లాలో అధికారులు ఒక్కో ఊర్లో ఒక్కో సమయంలో కరెంట్ ఇస్తున్నారు.
కరీంనగర్ జిల్లాలో 99 వేలకు పైగా వ్యవసాయ కనెక్షన్లు ఉండగా.. పెద్దపల్లి జిల్లాలో ఒక లక్ష 33 వేలకు పైగా, జగిత్యాలలో 72 వేలు, రాజన్న సిరిసిల్ల జిల్లాలో 73 వేలకు పైగా.. ఉమ్మడి జిల్లాలో మొత్తం 3 లక్షల 79 వేల వ్యవసాయ కనెక్షన్లు ఉన్నాయి. కొన్నిచోట్ల రాత్రి పూట ఇవ్వడం, మరికొన్ని చోట్ల పగటి పూట ఇవ్వడంతో పొలాలకు సరిగా నీరు అందడం లేదు. పొలాల దగ్గర ఉన్న కరెంట్ మీటర్ల దగ్గరే రైతులు పడిగాపులు కాస్తున్నారు. 24 గంటల కరెంట్ ఏమో కానీ ఐదారు గంటల కరెంట్ సరిగా ఉండటం లేదని వాపోతున్నారు.
జగిత్యాల జిల్లాలో నాలుగున్నర నుంచి 5 లక్షల మెట్రిక్ టన్నుల వరి ధాన్యం దిగుబడి వస్తుంది. అయితే కరెంట్ కోతలు, పొలాలకు చీడ పురుగుల బెడదతో దిగుబడి తక్కువ వచ్చే అవకాశం కనిపిస్తోంది. రాజన్న సిరిసిల్ల జిల్లాలోనూ రైతులు ఇదే పరిస్థితిని ఎదుర్కొంటున్నారు. గత ఏడాదితో పోల్చితే ఈ ఏడాది విద్యుత్ డిమాండ్ ఎక్కువగా ఉందని అధికారులు చెప్తున్నారు. కనీసం ఉన్న పంటనైనా కాపాడుకోవాలంటే నిరంతరంగా కరెంట్ ఇవ్వాలని రైతులు పట్టుబడుతున్నారు. ఇప్పటికే చీడపీడల కారణంగా నష్టపోతున్నామని.. తాజాగా కరెంటు కోతలతో మరిన్ని ఇబ్బందులు ఎదురవుతున్నాయని అన్నదాతలు ఆందోళన వ్యక్తం చేస్తున్నారు.
ఇవీ చదవండి:
