అథ్లెటిక్స్‌లో ప్రపంచస్థాయి లక్ష్యాన్ని నిర్దేశించుకున్న ఏపీ ప్రకాశం జిల్లా యువకుడు మహేశ్... అలుపెరగకుండా శ్రమిస్తున్నాడు. సామాన్యులకు ఊహించేందుకైనా సాధ్యంకాని రీతిలో 300 కిలోమీటర్ల మారథాన్ పరుగును పూర్తి చేయడంపై గురి పెట్టాడు. ప్రపంచ రికార్డు సాధనే లక్ష్యంగా ఏపీ గుంటూరు నగర శివారు పేరేచర్లలో బుధవారం సాయంత్రం 6గంటల 15 నిమిషాలకు పరుగు ప్రారంభించాడు.
ఫిరంగిపురం, నరసరావుపేట, వినుకొండ, త్రిపురాంతకం, యర్రగొండపాలెం, మార్కాపురం, కంభం, బెస్తవారిపేట, గిద్దలూరు, రాచర్ల మీదుగా... తిరిగి బెస్తవారిపేట చేరుకోవాలనే ప్రణాళికకు అనుగుణంగా పరుగు సాగిస్తున్నాడు. శుక్రవారం ఉదయం కల్లా 300 కిలోమీటర్ల పరుగు పూర్తి కానుంది.
ఏడాదిగా సాధన...
మధ్యలో ఎక్కడా ఆగేందుకు వీలు లేనందున... ఆహారం తీసుకోకుండా, కేవలం ఎనర్జీ డ్రింక్స్ సాయంతోనే మహేశ్ పరుగు కొనసాగిస్తున్నాడు. అయితే... బూట్లు మార్చుకొనేందుకు వంద కిలోమీటర్లకు ఓసారి చొప్పున 2 చిన్నపాటి విరామాలతో పరుగు కొనసాగనుంది. గతంలో వంద కిలోమీటర్ల పరుగుని మహేశ్ 10 గంటల్లో పూర్తి చేశాడు. ఈసారి మరింత భారీ లక్ష్యాన్ని నిర్దేశించుకుని... అందుకోసం ఏడాదిగా సాధన చేశాడు.
ప్రకాశం జిల్లా బెస్తవారిపేటకు చెందిన మహేశ్... ఇంటర్మీడియట్ పూర్తి చేసిన తర్వాత పరుగు పందాలపై ఆసక్తి పెంచుకున్నాడు. నాటి నుంచీ నిత్యం సాధన చేస్తూ అవసరమైన శారీరక దారుఢ్యం, నైపుణ్యం సంపాదించాడు. ప్రపంచస్థాయి పోటీల్లో సత్తా చాటాలని భావిస్తున్న మహేశ్... ఆ దిశలో ప్రభుత్వ సహకారం పొందాలనే లక్ష్యంతో ఈ రికార్డు పరుగు చేపట్టాడు. అంతర్జాతీయ స్థాయిలో అల్ట్రా మారథాన్ పోటీల్లో పాల్గొని దేశానికి పతకం తేవడమే లక్ష్యమని చెబుతున్నాడు.
ఇవీచూడండి: చలి పంజా: నెహ్రూ జూపార్కులో మూగజీవాల కోసం ప్రత్యేక ఏర్పాట్లు
