తెలంగాణలో భాజపా ప్రభుత్వ ఏర్పాటే లక్ష్యంగా బండి సంజయ్ చేపట్టిన ప్రజా సంగ్రామ యాత్ర గోల్కొండకు చేరుకుంది. పాతబస్తీకి ఎప్పుడైనా వెళ్లి తీరుతామని బండి సంజయ్ అన్నారు. 2023 ఎన్నికల్లో గెలిచి గోల్కొండ కోటపై కాషాయ జెండా రెపరెపలాడిస్తామని ధీమా వ్యక్తం చేశారు. భాజపా ఏ మతానికి వ్యతిరేకం కాదని.. ముస్లింలను కాపాడేందుకే ట్రిపుల్ తలాక్ను భాజపా సర్కారు అడ్డుకుందన్నారు. హిందూ మతాన్ని చీల్చే ప్రయత్నం చేస్తే తప్పకుండా అడ్డుకుంటామన్నారు. అన్ని వర్గాలకు ప్రధాని ఆవాస్ యోజన కింద కేంద్రంలోని భాజపా సర్కారు సాయం అందించిందన్నారు.
పాతబస్తీని ఎందుకు అభివృద్ధి చేయడం లేదో ముఖ్యమంత్రి కేసీఆర్ చెప్పాలని డిమాండ్ చేశారు.తెలంగాణ ఏర్పాటును ఎంఐఎం పార్టీ వ్యతిరేకించిందని.. వారితో తెరాస చెట్టాపట్టాలేసుకుని తిరుగుతోందని ఆయన ఆరోపించారు. ఏ పార్టీ అధికారంలో ఉంటే వారి వెంట ఉండే పార్టీ ఎంఐఎం అని విమర్శించారు. తప్పకుండా రాబోయే ఎన్నికల్లో గెలిచి గోల్కొండ కోటపై జెండా ఎగిరేసి తీరుతామన్నారు. అయోధ్యలో కర సేవకుల త్యాగాలను వృథాగా పోనివ్వమని బండి సంజయ్ స్పష్టం చేశారు. 371 ఆర్టికల్ రద్దు కోసం అనేకమంది ప్రాణత్యాగాలు చేశారని... వారి త్యాగాలను వృథాగా పోనివ్వమన్నారు. ప్రజలకు అన్ని విషయాలను వివరించేందుకే ప్రజా సంగ్రామ యాత్రను చేపట్టామన్నారు. హుజూరాబాద్లో ఈటల రాజేందర్ గెలిచి తీరతారని బండి సంజయ్ జోస్యం చెప్పారు.
భారతీయ జనతా పార్టీని మతతత్వపార్టీగా ముద్ర వేసే కుట్ర చేస్తున్నారు. పాతబస్తీని తెరాస, ఎంఐఎం పార్టీలు ఎందుకు అభివృద్ధి చేయట్లేదు. ముస్లిం మహిళలను ఆదుకునేందుకు ట్రిపుల్ తలాక్ను అడ్డుకున్నాం. భాజపా ఏ మతానికి వ్యతిరేకం కాదు. హిందూ మతాన్ని చీల్చే ప్రయత్నం చేస్తే తప్పకుండా అడ్డుకుంటాం. 2023 ఎన్నికల్లో గెలిచి.. గోల్కొండ కోటపై కాషాయ జెండా రెపరెపలాడిస్తాం. -బండి సంజయ్, భాజపా రాష్ట్ర అధ్యక్షుడు
ఇదీ చదవండి: REVANTH REDDY: చంద్రబాబును అప్పుడెందుకు పొగిడినవ్.. కేటీఆర్ ఎట్ల గెలిచిండో యాదికిలేదా?
