కరోనా వల్ల వచ్చిన లాక్డౌన్తో టెన్నిస్ ప్లేయర్లు దాదాపు ఆనందంగా ఉన్నారని అంటున్నాడు దిగ్గజ క్రీడాకారుడు రోజర్ ఫెదరర్. ఏడాది మొత్తం టోర్నీలతో బిజీగా ఉండే వాళ్లకు ఇప్పుడు చాలా విశ్రాంతి లభించిందని చెప్పాడు. గాయాలు కావడం వల్ల ఈ సంవత్సరం ఎలాంటి పోటీల్లోనూ పాల్గొనడం లేదని స్పష్టం చేశాడు. టెన్నిస్ రాకెట్ పట్టుకునేది వచ్చే ఏడాదేనని తాజాగా ఓ ఇంటర్వ్యూలో తెలిపాడు.
"20 ఏళ్లుగా పర్యటనల్లో మునిగితేలుతున్న నాకు దొరికిన ఈ విశ్రాంతిని ఆస్వాదిస్తున్నాను. కొంతమంది బలవంతంగా ఇంట్లో ఉన్నప్పటికి.. లాక్డౌన్తో 90 శాతం మంది ఆటగాళ్లు ఆనందంగానే ఉన్నారు. ఎందుకంటే టెన్నిస్ షెడ్యూల్స్ అనేవి నిర్విరామంగా ఉంటాయి" అని ఫెదరర్ అన్నాడు.
అయితే లాక్డౌన్తో కొందరు క్రీడాకారులు ఆర్థిక ఇబ్బందులు ఎదుర్కొంటున్నారని ఆవేదన వ్యక్తం చేశాడు ఆస్ట్రేలియా టెన్నిస్ ఆటగాడు ఆండ్రూ హారిస్. ఫెదరర్ వ్యాఖ్యలపై స్పందిస్తూ ఇలా మాట్లాడాడు.
"ఫెదరర్ సంపన్నుడని నాకు తెలుసు. ఆర్థిక సమస్యలను ఎదుర్కొంటున్న క్రీడాకారులకు సాయం చేస్తానని అతడు బహిరంగంగా ప్రకటించొచ్చు. కానీ, అలా చేయడు. ఎందుకంటే ఎప్పుడూ అగ్రస్థానంలో ఉండటమే అతడికి ముఖ్యం" అని ఆండ్రూ చెప్పాడు.
