kidambi srikanth thomas cup: ప్రతిష్టాత్మక థామస్ కప్ విజయంలో కీలక పాత్ర పోషించిన భారత స్టార్ షట్లర్ కిదాంబి శ్రీకాంత్ను ప్రధానమంత్రి నరేంద్ర మోదీ ప్రశంసించారు. మరో స్టార్ షట్లర్ లక్ష్యసేన్ ప్రధాని మోదీకి 'అల్మోరా బాల్ మిఠాయి'ని కానుకగా ఇచ్చాడు. థామస్, ఉబెర్ కప్లు గెలిచిన క్రీడాకారులతో మోదీ స్వయంగా మాట్లాడి, శుభాకాంక్షలు తెలిపారు. దశాబ్దాల తర్వాత థామస్ కప్ గెలిపించి.. దేశానికి గర్వకారణంగా నిలిచారని క్రీడాకారులను అభినందించారు. ఇలాంటి పెద్ద టోర్నమెంట్లో ఫైనల్కు చేరడం సులభం కాదని.. ఈ సందర్భంగా జట్టుకు నేతృత్వం వహించిన శ్రీకాంత్ను అభినందించారు మోదీ.
దేశ ప్రధాని మా వెనుక ఉన్నారని.. క్రీడాకారులందరం గర్వంగా చెపుతాం. మ్యాచ్ గెలిచిన అనంతరం మోదీ మాట్లాడటం చాలా సంతోషాన్నిచ్చింది. మేము మరింత బాగా రాణించేలా ఇది ప్రొత్సహిస్తోంది. భారత జట్టుకు నాయకత్వం వహించడం గొప్ప అదృష్టం.
-కిదాంబి శ్రీకాంత్, షట్లర్
ప్రధానికి లక్ష్యసేన్ తియ్యటి కానుక: తనకు అల్మోరా బాల్మిఠాయి తెచ్చినందుకు లక్ష్యసేన్కు ధన్యావాదాలు తెలిపారు ప్రధానమంత్రి నరేంద్ర మోదీ. తన చిన్న కోరికను గుర్తుంచుకొని నెరవేర్చినందుకు కృతజ్ఞతలు చెప్పారు. థామస్ కప్ గెలిచిన అనంతరం క్రీడాకారులతో మోదీ ఫోన్లో మాట్లాడారు. ఈ సందర్భంగా లక్ష్యసేన్తో మాట్లాడిన మోదీ.. తనకు స్వీట్ కావాలని కోరారు.
నేను తొలిసారిగా యూత్ ఒలింపిక్స్ గెలిచినపుడు మోదీని కలిశా. మళ్లీ ఈరోజు కలిసే అవకాశం వచ్చింది. ఆయనను ఎప్పుడు కలిసినా సరే మాలో ఆత్మవిశ్వాసం పెరుగుతుంది. మోదీని కలిసి బాల్మిఠాయి ఇవ్వడానికి.. మరిన్ని టోర్నమెంట్లు గెలుస్తా. అల్మోరా మిఠాయికి ప్రసిద్ధి అని.. మా నాన్న, తాతయ్య క్రీడాకారులు అని గుర్తుచేశారు. అంత పెద్ద హోదాలో ఉండి ప్రతి చిన్న విషయాలను గుర్తుచేయడం అరుదైన విషయం.
-లక్ష్యసేన్, షట్లర్
Thomos cup 2022 winner: మే 15న జరిగిన ఫైనల్లో థామస్ కప్ గెలిచి.. 43 ఏళ్ల నిరీక్షణకు తెరదించుతూ చరిత్ర సృష్టించింది భారత పురుషుల బ్యాడ్మింటన్ జట్టు. గత 70 ఏళ్ల చరిత్రలో భారత్ ఒక్కసారి కూడా ఫైనల్కు చేరలేకపోయింది. 1952, 1955, 1979లో భారత పురుషుల జట్టు సెమీఫైనల్కు చేరుకుంది.
ఇదీ చదవండి: Thaliand Open: సెమీస్లో సింధు ఓటమి.. టోర్నీ నుంచి ఔట్
