'సుశీల్​.. ఎందుకిలా చేశావ్​?'

భారత రెజ్లర్ సుశీల్ కుమార్ అరెస్టుపై పలువురు క్రీడాకారులు స్పందించారు. ప్రస్తుతానికి ఇది ఆరోపణ మాత్రమేనని, నేరం రుజువైతే భారత క్రీడా వ్యవస్థలో ఇదొక చీకటి కోణంగా మిగిలిపోతుందని పలువురు క్రీడాకారులు అభిప్రాయపడుతున్నారు.

భారత స్టార్ రెజ్లర్​, రెండుసార్లు ఒలింపిక్ పతక విజేత సుశీల్​ కుమార్​ను హత్య కేసు ఆరోపణలతో దిల్లీ పోలీసులు అరెస్ట్​ చేశారు. తన విజయాలతో మువ్వెన్నల పతకాన్ని రెపరెపలాడేలా చేసిన సుశీల్​.. దిల్లీ పోలీసుల వద్ద ముఖానికి టవల్​తో కనిపించడంపై పలువురు క్రీడాకారులు స్పందించారు. సుశీల్​ అసలు ఇలా ఎందుకు చేశాడో అర్థం కావడం లేదంటున్నారు. ఈ సమయంలో ఏం మాట్లాడాలో తెలియడం లేదంటూ ఆవేదన వ్యక్తం చేస్తున్నారు. ఇదంతా ప్రపంచ రెజ్లింగ్ దినోత్సవం రోజునే జరగడం గమనార్హం.

2008 బీజింగ్​ ఒలింపిక్స్​లో సుశీల్​తో పాటు కాంస్య పతకం సాధించిన బాక్సర్​ విజేందర్ సింగ్.. అరెస్టుపై స్పందించాడు. "సుశీల్​.. భారతీయ క్రీడల కోసం చేసిన కృషి అతనితో పాటే ఉంటుంది. ప్రస్తుత సమయంలో ఇంతకంటే ఎక్కువ చెప్పలేను," అని​ పేర్కొన్నాడు.

"నిజంగా ఈ హత్య కేసులో సుశీల్ ప్రమేయముంటే అది దురదృష్టకరం. ఇది కేవలం రెజ్లింగ్​కు మాత్రమే కాక పూర్తి భారత క్రీడలపై చెడు ప్రభావం చూపిస్తుంది. మనకున్న అత్యుత్తమ అథ్లెట్లలో సుశీల్ ఒకడు. ఇప్పుడు ప్రజలు అతని వైపు చూస్తున్నారు," అని టేబుల్​ టెన్నిస్ ఆటగాడు శరత్ కమల్ పేర్కొన్నాడు.

"సుశీల్​ ఒక మర్యాదపూర్వకమైన వ్యక్తి. అతనొక రోల్ మోడల్​. అతనికి డబ్బుతో పాటు పేరు ప్రఖ్యాతలు లభించాయి. ఇలాంటి ఘటనల్లో పాల్గొనకుండా ఉండాల్సింది. ఇలా జరగడం సిగ్గుచేటు, దురదృష్టకరం," అని హాకీ మాజీ కెప్టెన్ అజిత్​పాల్ సింగ్ తెలిపాడు.

ఇదీ చదవండి: రెజ్లర్ సుశీల్ అరెస్టు: కెరీర్​ను నాశనం చేసిన అద్దె గొడవ

వీరితో పాటు చాలా మంది క్రీడాకారులు సుశీల్​ అరెస్ట్​పై స్పందించారు. "ప్రస్తుతానికి సుశీల్ నిందితుడే.. అతడిపై నేరం ఇంకా నిరూపణ కాలేదు. ఇందులో అతని పాత్ర ఏమీ లేకపోతే.. అతనికి కచ్చితంగా న్యాయం జరుగుతుంది," అని అతని సన్నిహిత క్రికెటర్​ ఒకరు తెలిపాడు.

"సుశీల్​పై వస్తున్న ఆరోపణలు నిజమైతే భారత క్రీడా చరిత్రలో ఇదొక చీకటి ఎపిసోడ్ అవుతుంది. చాలా మంది యువ రెజ్లర్లకు అతడొక రోల్​ మోడల్" అని మరో క్రీడాకారుడు అభిప్రాయపడ్డాడు.

"ప్రస్తుతానికైతే రెజ్లింగ్​పై ఇది ప్రభావం చూపిస్తుంది. క్రీడలు నేటితో ఆగిపోయేవి కావు. ఈ సంఘటన కాలగర్భంలో కలిసిపోతుంది. క్రికెట్​లో స్పాట్​ ఫిక్సింగ్​, మ్యాచ్​ ఫిక్సింగ్ జరుగుతున్న ఉదంతాలున్నాయి. ఇది కూడా అంతే.. అంతగా ప్రభావం చూపదు," అని ఓ ప్రముఖ బ్యాడ్మింటన్ ఆటగాడు పేర్కొన్నాడు.

అసలేం జరిగింది?

ఛత్రసాల్​ స్టేడియంలో మే 4న రెండు గ్రూపుల మధ్య గొడవ జరిగింది. ఇందులో మల్లయోధులు సాగర్​, సోను, అమిత్​ల బృందంపై.. సుశీల్​ కుమార్, అతని అనుచరులు దాడికి పాల్పడినట్లు ఆరోపణలు ఉన్నాయి. ఇందులో సాగర్​ మరణించగా.. మరో ఇద్దరు గాయపడ్డారు. సంఘటన స్థలంలో కొన్ని వాహనాలతో పాటు ఓ గన్ లభ్యమయ్యాయి. ఇందుకు సంబంధించి మోడల్​ టౌన్​ పోలీస్​ స్టేషన్​లో కేసు నమోదైంది. అప్పటి నుంచి పరారీలో ఉన్న సుశీల్​ను.. తాజాగా దిల్లీ పోలీసులు అరెస్ట్​ చేశారు.

ఇదీ చదవండి: సుశీల్​ బెయిల్​ పిటిషన్​ తిరస్కరణ