ఇంగ్లాండ్ క్రికెట్లో వివాదాస్పద ట్వీట్ల వ్యవహారం రోజురోజుకూ ముదురుతోంది. ఈ విషయమై ఇంగ్లాండ్ క్రికెట్ బోర్డు చేస్తోన్న విచారణకు కొంతమంది మద్దతు ఇస్తుండగా.. గడిచిపోయిన గతాన్ని గురించి ప్రస్తుతం మళ్లీ లేవనెత్తడం సరికాదంటూ మరికొంతమంది అభిప్రాయపడుతున్నారు. ఈ క్రమంలో దీనిపై స్పందించిన ఆ దేశ మాజీ సారథి మైఖేల్ వాన్.. ఈసీబీ చేస్తున్న విచారణను తప్పుబట్టాడు. తక్షణమే ఆ ప్రక్రియ ఆపివేయాలని సూచించాడు.
"మోర్గాన్, బట్లర్, అండర్సన్.. ట్వీట్స్ చేసిన సందర్భంలో ఎవరూ పట్టించుకోలేదు, బాధపడలేదు. కానీ ఇప్పుడు మాత్రం అవి ఎందుకు ప్రతికూలంగా కనిపిస్తున్నాయో? ఆశ్చర్యంగా ఉంది. ఇదంతా హాస్యస్పదంగా కనిపిస్తోంది. ఈ విచారణను ఆపివేయాలి." అని వాన్ ట్వీట్ చేశాడు.
ఇదీ జరిగింది
ఇంగ్లాండ్ క్రికెట్ బోర్డు.. వివాదాస్పద ట్వీట్లపై క్రమశిక్షణ ఉల్లంఘన చర్యల కింద చేపట్టిన విచారణను ఇటీవల వేగవంతం చేసింది. ఇందులో భాగంగా వరుసగా ఆటగాళ్లను విచారించడం ప్రారంభించింది. ఈ నేషథ్యంలోనే ఎనిమిదేళ్ల క్రితం స్త్రీ వివక్ష, జాత్యంహకార సందేశాలను సామాజిక మాధ్యమాల్లో పోస్ట్లు చేశాడని యువ బౌలర్ ఒల్లీ రాబిన్సన్ (Ollie Robinson)ను అంతర్జాతీయ క్రికెట్ నుంచి ఇటీవల సస్పెండ్ చేసింది. ఈ క్రమంలోనే ప్రస్తుత కెప్టెన్ ఇయాన్ మోర్గాన్(Eoin Morgan), వికెట్కీపర్-బ్యాట్స్మన్ జాస్ బట్లర్(Jos Buttler) గతంలో భారతీయులను అపహాస్యం చేస్తూ చేసిన ట్వీట్ల స్క్రీన్షాట్లు సోషల్మీడియాలో వైరల్ అయ్యాయి. దీంతో వారిని కూడా విచారిస్తోంది.
ఇదీ చూడండి: Tweet controversy: వివాదంలో మరో ఇద్దరు క్రికెటర్లు
