బోర్డర్ గావస్కర్ ట్రోఫీలో భాగంగా ఆస్ట్రేలియాతో జరిగిన చివరి టెస్టులో టీమ్ఇండియా స్టార్ బ్యాటర్ విరాట్ కోహ్లీ అద్భుతమైన శతకంతో చెలరేగిన సంగతి తెలిసిందే. ఈ క్రమంలోనే ఇప్పుడు వన్డే సిరీస్ కోసం సిద్ధమవుతున్నాడు. అయితే ఈ సిరీస్లో అతడు కొన్ని రికార్డులు అందుకునే అవకాశం ఉంది. అదేంటంటే.. అహ్మదాబాద్ టెస్టులో మంచి ప్రదర్శనతో 'ప్లేయర్ ఆఫ్ ది మ్యాచ్' అవార్డును సొంతం చేసుకున్న విరాట్.. వన్డే సిరీస్లో కూడా అలాగే ఆడాలని ఫ్యాన్స్ ఆశిస్తున్నారు. ఒకవేళ అభిమానులు ఆశించినట్టు కోహ్లీ అద్భుతంగా ఆడి 'ప్లేయర్ ఆఫ్ ది మ్యాచ్' అవార్డును దక్కించుకుంటే.. అతడు మరో అరుదైన ఘనతను సాధించినట్టువుతుంది. ఆస్ట్రేలియాపై అత్యధికంగా ఈ అవార్డులు అందుకున్న ఆటగాళ్ల జాబితాలో విరాట్ రెండో స్థానంలో నిలుస్తాడు.
అహ్మదాబాద్ వేదికగా జరిగిన టెస్టులో అందుకున్న అవార్డు.. ఆసీస్పై కోహ్లీకి తొమ్మిదోది. ఇంకొక్క అవార్డును అతడు ముద్దాడితే వివ్ రిచర్డ్స్, ఇయాన్ బోథమ్‌తో సమానంగా పది 'ప్లేయర్ ఆఫ్ ది మ్యాచ్' అవార్డులతో రెండో స్థానంలో నిలుస్తాడు. ఈ జాబితాలో ఇప్పటికే దిగ్గజ క్రికెటర్ సచిన్ తెందుల్కర్ అగ్రస్థానంలో నిలిచాడు. అతడు ఆసీస్పై ఏకంగా 17 ప్లేయర్ ఆఫ్ ది మ్యాచ్ అవార్డులు అందుకున్నాడు.
ఇకపోతే ఆస్ట్రేలియాపై చెలరేగిపోయే బ్యాటర్లలో విరాట్ కోహ్లీ ఒకడు. అయితే జరగబోయే వన్డే సిరీస్లో అతడు మరో సెంచరీ చేస్తే.. కంగారులపై అత్యధిక సెంచరీలు చేసిన ఆటగాడిగా కోహ్లీ రికార్డుకెక్కుతాడు. అహ్మదాబాద్ వేదికగా జరిగిన టెస్టులో బాదిన శతకం కోహ్లీకి అంతర్జాతీయ కెరీర్‌లో 75వది. వీటిలో 16 శతకాలు ఆసీస్పై బాదినవే. ఇక వన్డేల్లో ఆసీస్పై కోహ్లీ 8 శతకాలు బాదాడు. ఇక జరగబోయే ఈ మూడు మ్యాచులో వన్డే సిరీస్లో ఒక్క సెంచరి బాదితే .. ఆసీస్పై అత్యధిక సెంచరీలు చేసిన ప్లేయర్గా సచిన్ రికార్డును సమం చేస్తాడు విరాట్. లేదంటే అధిగమించే అవకాశం ఉంటుంది.
ఇంకా ఆసీస్‌తో జరిగబోయే వన్డే సిరీస్లో మరో మైలురాయిని కూడా కోహ్లీ చేరుకునే ఛాన్స్ ఉంది. అంతర్జాతీయ వన్డే క్రికెట్‌లో 13 వేల పరుగుల మైలురాయిని అందుకోవడానికి విరాట్ అతి దగ్గరలో ఉన్నాడు. ప్రస్తుతం కోహ్లీ 262 వన్డే ఇన్నింగ్సుల్లో 12 వేల 809 పరుగులతో కొనసాగుతున్నాడు. ఇక తాజా సిరీస్లో మరో 191 పరుగులు చేస్తే.. 13 వేల పరుగుల మైలురాయిని చేరుకుంటాడు. అంతేకాకుండా అత్యంత వేగంగా ఈ రికార్డును సాధించిన ప్లేయర్గా కోహ్లీ నిలిచే అవకాశం ఉంది.
ఇదీ చూడండి: ఐపీఎల్‌ 2024లోనూ మహీ ఆడతాడా? రైనా ఏం చెప్పాడంటే?
