ICC RANKINGS: భారత బ్యాటర్ శ్రేయస్ అయ్యర్ ఐసీసీ టీ20 ర్యాకింగ్స్లో దూసుకుపోయాడు. ఐసీసీ తాజాగా విడుదల చేసిన జాబితాలో 8 స్థానాలు ఎగబాకి 18వ స్థానం సంపాదించుకున్నాడు. మాజీ కెప్టెన్ విరాట్ కోహ్లీకి టాప్ 10లో కూడా చోటు దక్కలేదు. శ్రీలంకతో సిరీస్ విశ్రాంతి తీసుకున్న కోహ్లీ 5 స్థానాలు పడిపోయి 15వ స్థానంలో ఉన్నాడు.
శ్రీలంకతో జరిగిన టీ20 సిరీస్లో అయ్యర్ అద్భతమైన ప్రదర్శన చేయడం వల్ల మెరుగైన స్థానానికి చేరుకున్నాడు. భారత్ ఈ సిరీస్ను 3-0 తేడాతో గెలిచింది. అయ్యర్ 3 మ్యాచుల్లో 174 స్ట్రైక్ రేట్తో 204 పరుగులు సాధించాడు.
శ్రీలంక ఆటగాడు పాతుమ్ నిస్సాంక 9వ స్థానాన్ని సంపాదించాడు. ఇండియాతో జరిగిన రెండో మ్యాచ్లో 75 పరుగులు చేశాడు. యుఏఈ ఆటగాడు మహ్మద్ వసీమ్ 12వ స్థానంలో నిలిచాడు. ఆ దేశం తరఫున టీ20ల్లో అత్యుత్తమ ర్యాంక్ను సాధించాడు. అంతకుముందు శమీన్ అన్వర్ 2017లో 13 ర్యాంకు సాధించాడు. ఐసీసీ టీ20 ప్రపంచకప్ క్వాలిఫైయర్లో భాగంగా ఐర్లాండ్తో మ్యాచ్లో అజేయమైన సెంచరీతో ఆకట్టుకున్నాడు. శ్రీలంక పేసర్ లహిరు కుమార ఇండియాతో సిరీస్లో 5 వికెట్లు సాధించి తొలిసారిగా టాప్ 40లోకి ఎంట్రీ ఇచ్చాడు.
టెస్టు ర్యాంకుల్లో రబాడ పైకి..
టెస్ట్ ర్యాకింగ్స్లో దక్షిణాఫ్రికా బౌలర్ కగిసో రబడ మూడో స్థానానికి ఎగబాకాడు. న్యూజిలాండ్తో 2 మ్యాచ్ల సిరీస్లో 5/60 అద్భుత ప్రదర్శనతో పాటు 10 వికెట్లు తీసి విజయంలో కీలక పాత్ర పోషించాడు. కివీస్ ద్వయం కైల్ జేమిసన్, టిమ్ సౌథీలు తమ స్థానాలను కోల్పోయారు. జేమిసన్ రెండు స్థానాలు జారి 5 స్థానంలో, టిమ్ సౌథీ ఒక స్థానం కోల్పోయి 6 స్థానంలో ఉన్నాడు. ఈ జాబితాలో ఆస్ట్రేలియా కెప్టెన్ పాట్ కమిన్స్ అగ్రస్థానంలో, భారత స్పిన్నర్ రవిచంద్రన్ అశ్విన్ రెండో స్థానంలో కొనసాగుతున్నారు. బ్యాటింగ్ జాబితాలో మార్నస్ లబుషేన్ అగ్రస్థానంలో ఉన్నాడు.
టాప్లోనే బాబర్..
వన్డే ర్యాకింగ్స్లో బ్యాటర్ల జాబితాలో పాకిస్థాన్ ఆటగాడు బాబర్ అజామ్, బౌలర్ల జాబితాలో న్యూజిలాండ్ పేసర్ ట్రెంట్ బౌల్ట్ ప్రథమ స్థానంలో కొనసాగుతున్నారు.
ఇదీ చదవండి: నాలుగేళ్ల తర్వాత ఐర్లాండ్ టూర్కు టీమ్ఇండియా రోహిత్, కోహ్లీ దూరం!
