టీమ్ఇండియా మాజీ ఫాస్ట్ బౌలర్ శాంతకుమారన్‌ శ్రీశాంత్ మరోసారి వార్తల్లో నిలిచాడు. మార్చి 31 నుంచి ప్రారంభమయ్యే ఐపీఎల్ సీజన్లో ఈ కేరళ ఆటగాడు దర్శనమివ్వనున్నాడట. కానీ, మ్యాచ్లు ఆడేందుకు బ్యాట్, బాల్లు పట్టుకోవడానికి కాదు. ఇండియన్ ప్రీమియర్ లీగ్ టోర్నమెంట్ అధికారిక ప్రసారకర్త అయిన స్టార్ స్పోర్ట్స్ ఛానల్ తన ప్యానెల్లో చర్చా సభ్యులుగా వ్యవహరించే వారి పేర్ల జాబితాను తాజాగా ప్రకటించింది. అయితే ఈ లిస్ట్లో ఎస్.శ్రీశాంత్ పేరు కూడా ఉండడం విశేషం.
ఐపీఎల్ 2013 సీజన్లో స్పాట్ ఫిక్సింగ్ వివాదంలో చిక్కుకున్నాడు శ్రీశాంత్. ఆ తర్వాత మళ్లీ ఎప్పుడూ ఇండియన్ ప్రీమియర్ లీగ్‌లో కనిపించలేదు ఇతడు. దీంతో శ్రీశాంత్పై అప్పట్లో మ్యాచ్లు ఆడకుండా నిషేధం విధించింది కోర్టు. అనంతరం కేసును కొట్టివేయడంతో కాస్త ఊరట లభించింది ఇతడికి. అయితే క్రికెట్ కెరీర్కి శ్రీశాంత్ విరామం చెప్పి కేవలం ఏడాది మాత్రమే అయ్యింది. ఈ నేపథ్యంలో స్టార్ స్పోర్ట్స్ తాజా నిర్ణయంతో సరిగ్గా పదేళ్ల తర్వాత ఐపీఎల్లో సందడి చేయనున్నాడు ఈ కేరళ ప్లేయర్. అయితే స్టార్ స్పోర్ట్స్ మలయాళ ఛానెల్‌లో శ్రీశాంత్ వ్యూయర్ అనలిస్ట్‌గా వ్యవహరించనున్నాడు. దీని ద్వారా 10 ఏళ్ల తర్వాత ఐపీఎల్లో రెండో ఇన్నింగ్స్‌ను ప్రారంభించేందుకు రెడీ అయ్యాడు శ్రీశాంత్.
శ్రీశాంత్‌తో పాటు ఈసారి స్టార్ స్పోర్ట్స్ ఛానెల్స్‌లో దక్షిణాఫ్రికా ప్లేయర్ జాక్వెస్ కలిస్, ఆస్ట్రేలియన్ ఆటగాడు ఆరోన్ ఫించ్, ఇంగ్లాండ్ క్రికెటర్స్ కెవిన్ పీటర్సన్, పాల్ కాలింగ్‌వుడ్, మరో ఆస్ట్రేలియన్ ఆటగాడు టామ్ మూడీ, భారత మాజీ ప్లేయర్స్ ఇర్ఫాన్ పఠాన్, హర్భజన్ సింగ్, మురళీ విజయ్, మహ్మద్ కైఫ్, యూసుఫ్ పఠాన్లు కూడా కనిపించనున్నారు.
ఐపీఎల్లో పంజాబ్ కింగ్స్, కొచ్చిన్ టస్కర్స్, రాజస్థాన్ రాయల్స్ టీమ్ల తరఫున ఆడిన శ్రీశాంత్ మొత్తం 44 మ్యాచుల్లో 40 వికెట్లు పడగొట్టాడు. కాగా, 2013లో రాజస్థాన్ రాయల్స్ జట్టులో ఉన్న సమయంలోనే స్పాట్ ఫిక్సింగ్ కేసులో అడ్డంగా బుక్కయ్యాడు. ఆ తర్వాత శ్రీశాంత్పై ఐపీఎల్ నిర్వాహకులు నిషేధం విధించారు. ఇక ఇప్పుడు స్టార్ స్పోర్ట్స్ ఛానెల్ ద్వారా మళ్లీ ఐపీఎల్లో కనిపిస్తాడు.
మరోవైపు గతేడాది మార్చి 9న అంతర్జాతీయ క్రికెట్‌తో పాటు అన్ని ఫార్మాట్లకి రిటైర్మెంట్ ప్రకటించాడు ఈ కేరళ క్రికెటర్. అయితే టీమిండియా మాజీ పేసర్ శ్రీశాంత్ గతేడాది క్రికెట్కు వీడ్కోలు పలికిన అనంతరం ఇతడిపై ప్రశంసలు కురిపించారు క్రికెట్ దిగ్గజం సచిన్ తెందూల్కర్. శ్రీశాంత్ను ఎప్పుడూ ఎంతో నైపుణ్యం కలిగిన బౌలర్గానే చూస్తానని అన్నారు సచిన్. "భవిష్యత్ తరం క్రికెటర్ల కోసం నా ఫస్ట్క్లాస్ క్రికెట్ కెరీర్ను ముగించాలని అనుకుంటున్నాను" అని ట్వీట్ చేశాడు శ్రీశాంత్.
స్పాట్ ఫిక్సింగ్ రచ్చ..
2012లో జరిగిన ఐపీఎల్ స్పాట్ ఫిక్సింగ్ కుంభకోణంలో వచ్చిన ఆరోపణల నేపథ్యంలో రాజస్థాన్ రాయల్స్ తరఫున ఆడిన శ్రీశాంత్ను దిల్లీ పోలీసులు అరెస్టు చేశారు. విచారణలో తప్పు అంగీకరించడం వల్ల ఇతడిపై బీసీసీఐ జీవితకాలపు నిషేధం విధించింది. కాగా, 2018లో ఇతడిపై ఉన్న బ్యాన్ను ఎత్తివేసి, ఇంగ్లాండ్ దేశవాళీ క్రికెట్ ఆడేందుకు అనుమతిచ్చింది. 2020 సంవత్సరంతో శ్రీశాంత్పై భారత క్రికెట్ బోర్డు విధించిన ఏడేళ్ల నిషేధం పూర్తయింది. దీంతో 2021లో సయ్యద్ ముస్తాక్ అలీ టోర్నీలో కేరళ తరఫున ప్రాతినిధ్యం వహించాడు శ్రీశాంత్.
