Suresh Raina IPL commentary: టీవీలలో రవిశాస్త్రి కామెంట్రీ మళ్లీ వినిపించనుంది. ఈ ఐపీఎల్ సీజన్లో హిందీ కామెంట్రీ ప్యానెల్లో రవిశాస్త్రి పేరు ఖరారైంది. ఐపీఎల్ ప్రసారదారు స్టార్ స్పోర్ట్స్ విడుదల చేసిన వివరాల్లో ఈ విషయం స్పష్టమైంది. శాస్త్రితో పాటు సురేశ్ రైనా సైతం.. ఆటను తన మాటలతో వివరించనున్నాడు. ఐపీఎల్లో అన్సోల్డ్ ప్లేయర్గా మిగిలిపోయిన రైనాకు.. కామెంట్రీ డెబ్యూ ఇదే కానుండటం విశేషం. హిందీ కామెంట్రీకి అతడిని ఎంపిక చేసుకుంది స్టార్ స్పోర్ట్స్.
Ravi Shastri IPL commentary
ఇండియన్ క్రికెట్ టీమ్ కోచ్ పదవి నుంచి దిగిపోయాక.. రవిశాస్త్రి కామెంట్రీ వినాలని చాలా మంది అభిమానులు ఆశించారు. ఇన్ని రోజుల తర్వాత మళ్లీ అతడు కామెంట్రీ చెప్పనుండటంపై ఫ్యాన్స్ సంతోషం వ్యక్తం చేస్తున్నారు. ఇక రైనా లేని ఐపీఎల్ను జీర్ణించుకోలేకపోతున్న అతడి అభిమానులు.. కనీసం కామెంటర్గానైనా టీవీలో చూసుకోవచ్చని అనుకుంటున్నారు. వీరిద్దరితో పాటు మాజీ క్రికెటర్లు, వ్యాఖ్యాతలు ఆకాశ్ చోప్రా, పార్థివ్ పటేల్, నిఖిల్ చోప్రా, ఇర్ఫాన్ పఠాన్లు హిందీ కామెంట్రీ ప్యానెల్లో ఉన్నారు.
ఇంగ్లిష్ కామెంట్రీలో సైతం పలువురు దిగ్గజాలు ఉన్నారు. లిటిల్ మాస్టర్ సునీల్ గావస్కర్, హైదరాబాదీ లెజెండ్ వీవీఎస్ లక్ష్మణ్, ఇయాన్ బిషప్, హర్ష భోగ్లే, మాథ్యూ హేడెన్లు ఇంగ్లిష్ కామెంట్రీతో అభిమానులను అలరించనున్నారు. లక్ష్మణ్ శివరామకృష్ణన్, మురళీ కార్తిక్, కెవిన్ పీటర్సన్ వంటి ప్రముఖులు సైతం ఇంగ్లిష్ ప్యానెల్లో ఉన్నారు.
ఇదీ చదవండి: IPL 2022: ఫ్యాన్స్ సంగతేంటి? ఎంత మందిని అనుమతిస్తారు?
