Newzealand Vs Srilanka World Cup 2023 : గత రెండు ప్రపంచకప్ల్లో రన్నరప్గా నిలిచి.. ఈ కప్లోనూ అత్యుత్తమ ప్రదర్శించింది న్యూజిలాండ్ జట్టు. కానీ అక్కడి నుంచి వరుసగా నాలుగు ఓటములతో సెమీస్ అవకాశాలను సంక్లిష్టం చేసుకుంది. దీంతో ఇప్పుడు సెమీస్లోకి వెళ్లాలంటే.. తప్పక నెగ్గాల్సిన మ్యాచ్‌లో గురువారం శ్రీలంకను ఢీకొట్టనుంది. కేవలం గెలుపు కాదు ఈ మ్యాచ్‌లో ఆ జట్టుకు ఘనవిజయం అవసరం.
అయితే ఇప్పుడున్న పరిస్థితిలో ప్రత్యర్థి కంటే ముందు కివీస్‌ను వరుణుడు భయపెడుతున్నాడు. మరొకొద్ది గంటల్లో జరగనున్న మ్యాచ్కు వర్షం ముప్పుందని వాతావరణ శాఖ సమాచారం. దీంతో ఇప్పుడు లంకపై ఓడినా లేకుంటే వాన కారణంగా మ్యాచ్ రద్దయినా కివీస్‌కు కష్టమే.
మరోవైపు ప్రపంచకప్లో భారత్కు ప్రత్యర్థి ఎవరు అన్న విషయం ఇప్పుడు ఆసక్తికరంగా మారింది. పట్టికలో అగ్రస్థానంలో నిలిచిన భారత్.. 8 పాయింట్లతో సమానంగా ఉన్న పాకిస్థాన్‌, న్యూజిలాండ్, అఫ్గానిస్థాన్‌ల నుంచి ఓ జట్టుతో సెమీస్‌లో తలపడనుంది. ఆ తర్వాత మరో సెమీస్‌లో దక్షిణాఫ్రికా, ఆస్ట్రేలియా ఢీకొట్టనున్నాయి.
ఇక గురువారం శ్రీలంకపై విజయం సాధిస్తే న్యూజిలాండ్ (0.398) సెమీస్కు చేరడం దాదాపు ఖాయం. ఎందుకంటే ఆ జట్టు రన్‌రేట్‌ పాకిస్థాన్‌ (0.036), అఫ్గాన్‌ (-0.338) కంటే మెరుగ్గా ఉంది. ఒకవేళ శ్రీలంకతో జరగనున్న మ్యాచ్ వర్షం కారణంగా రద్దయితే.. కివీస్‌కు అవకాశం ఉంటుంది. కానీ పాక్, అఫ్గాన్‌ తమ చివరి మ్యాచ్‌ల్లో ఓడిపోవాల్సి ఉంటుంది.
మరోవైపు అఫ్గాన్‌ ముందుకు వెళ్లాలంటే దక్షిణాఫ్రికాపై నెగ్గాల్సిఉంటుంది. పాక్, కివీస్ ఓడిపోవాలి. ఈ ముక్కోణపు రేసులో మిగతా రెండు జట్లతో పోలిస్తే పాక్‌కే కాస్త ప్రయోజనం ఉంది. ఎందుకంటే కివీస్, అఫ్గాన్‌ మ్యాచ్‌ల తర్వాత పాక్ ఆడుతుంది. ఒకవేళ నెట్‌ రన్‌రేట్‌ పరిగణలోకి వస్తే ఎంత తేడాతో గెలవాలనేది పాక్కు కూడా ముందే తెలిసిపోతుంది.
పాక్ గెలిస్తే.. వేదికలో మార్పు!
ఒకవేళ పాకిస్థాన్‌ సెమీస్ చేరితే.. రానున్న సెమీస్ మ్యాచ్కు వేదికలు మారనున్నాయి. నిజానికి పాయింట్ల పట్టికలో అగ్రస్థానంలో ఉన్న భారత్, నాలుగో స్థానంలో నిలిచే జట్టుతో వచ్చే బుధవారం వాంఖెడే వేదికగా సెమీస్ ఆడాల్సి ఉంది. కానీ ప్రత్యర్థిగా పాకిస్థాన్‌ వస్తే మాత్రం ఈ మ్యాచ్ ముంబయికి బదులు కోల్‌కతాలో జరుగుతుంది. షెడ్యూల్ను విడుదల చేసినప్పుడే ఐసీసీ ఈ విషయంపై క్లారిటీ ఇచ్చింది. మ్యాచ్‌ల కోసం ముంబయి వెళ్లేందుకు పాకిస్థాన్‌ నిరాకరించడమే అందుకు కారణం. ఇక దక్షిణాఫ్రికా,ఆస్ట్రేలియా మధ్య మరో సెమీస్ ముంబయిలో జరుగుతుంది.
'శ్రీలంకకు వస్తే రాళ్లతో కొడతాం'- షకీబ్‌కు మ్యాథ్యూస్ సోదరుడి వార్నింగ్!
మ్యాచ్ తర్వాత రచిన్ను కలవడానికి తాతయ్య ట్రై - కానీ ఐసీసీ అలా చేయడం వల్ల!
