ఇంగ్లాండ్ ఆల్ రౌండర్, టెస్టు కెప్టెన్ బెన్ స్టోక్స్ అరుదైన రికార్డు సృష్టించాడు. టెస్టు క్రికెట్ చరిత్రలో అత్యధిక సిక్సులు బాదిన క్రికెటర్గా నిలిచాడు. బే ఓవల్ స్టేడియం వేదికగా ఇంగ్లాండ్, న్యూజిలాండ్ మధ్య జరుగుతున్న మొదటి టెస్టులో స్టోక్స్ ఈ ఫీట్ అందుకున్నాడు. దీంతో అంతకుముందు ఈ రికార్డు సాధించిన న్యూజిలాండ్ మాజీ ప్లేయర్ బ్రెండన్ మెక్ కల్లమ్ను అధిగమించి ఈ ఘనతను సాధించాడు. కాగా, బ్రెండన్ మెక్ కల్లమ్ ప్రస్తుతం ఇంగ్లాండ్ టెస్టు ఫార్మాట్ హెడ్ కోచ్ కావడం గమనార్హం. ఇకపోతే ఇప్పటి వరకు 90 టెస్టులు ఆడిన బెన్ స్టోక్స్ 109 సిక్సులు బాదాడు. 36 సగటుతో మొత్తం 5,652 పరుగులు చేశాడు. అందులో 12 సెంచరీలు, 28 హాఫ్ సెంచరీలు కూడా ఉన్నాయి. ఈ టెస్టు ఫార్మాట్లో అత్యధిక వ్యక్తిగత స్కోరు 258 పరుగులు చేశాడు బెన్ స్టోక్స్.
ఇక మెక్ కల్లమ్ 101 టెస్టుల్లో 107 సిక్సులు బాదాడు. 38.64 సగటుతో మొత్తంగా 6,453 పరుగులు చేశాడు. అందులో 12 సెంచరీలు ఉన్నాయి. అతడి అత్యధిక వ్యక్తిగత స్కోరు 302. ఇక మెక్కల్లమ్ తర్వాత స్థానాల్లో ఆడమ్ గిల్క్రిస్ట్(100 సిక్సులు), క్రిస్ గేల్ (98), జేక్స్ కల్లిస్(97), వీరేంద్ర సెహ్వాగ్(91), బ్రియాన్ లారా(88), క్రిస్ కార్న్స్(87) వరుస స్థానాల్లో ఉన్నారు.
కాగా, న్యూజిలాండ్-ఇంగ్లాండ్ మధ్య జరగనున్న రెండు టెస్టుల సిరీస్లో భాగంగా.. ప్రస్తుతం మొదటి టెస్టు బే ఓవల్ స్టేడియంలో జరుగుతోంది. మూడో రోజు ఆట ముగిసేసరికి సమయానికి న్యూజిలాండ్ 5 వికెట్ల నష్టానికి 63 పరుగులు చేసింది. న్యూజిలాండ్ జట్టు విజయానికి 331 పరుగులు దూరంలో ఉంది. అయితే ఈ మ్యాచ్లో ఇంగ్లాండ్ రెండు ఇన్నింగ్స్ల్లోనూ అద్భుత ప్రదర్శన చేసింది. రెండో ఇన్నింగ్స్లో బ్రాడ్ (7), ఆండర్సన్ (6*) తప్ప మిగతా ప్లేయర్లందరూ రెండంకెల స్కోరు నమోదు చేయడం విశేషం.
ఇంగ్లాండ్ తొలి ఇన్నింగ్స్ : 325/9 (డిక్లేర్డ్)
న్యూజిలాండ్ తొలి ఇన్నింగ్స్ : 306/10
ఇంగ్లాండ్ రెండో ఇన్నింగ్స్ : 374/10
న్యూజిలాండ్ రెండో ఇన్నింగ్స్ : 63/5 (మూడో రోజు ఆట ముగిసేసరికి)
