James Faulkner PSL: పాకిస్థాన్ సూపర్ లీగ్లో బిజీగా ఉన్న పాక్ క్రికెట్ బోర్డుకు ఊహించని షాక్ తగిలింది. లీగ్లో క్వెట్టా గ్లాడియేటర్స్కు ఆడుతున్న ఆస్ట్రేలియా స్టార్ బౌలర్ జేమ్స్ ఫాల్కనర్ ఆ లీగ్ నుంచి నిష్క్రమించాడు. పీసీబీ.. ఒప్పందంలో భాగంగా తనకు చెల్లించాల్సిన మొత్తాన్ని బాకీ ఉంచిందని అతడు ఆరోపించాడు. ఈ మేరకు శనివారం ట్వీట్ చేశాడు.
"పాకిస్థాన్ క్రికెట్ అభిమానులకు క్షమాపణలు. కానీ దురదృష్టవశాత్తు మరో రెండు మ్యాచ్లు మిగిలి ఉండగానే నేను లీగ్ నుంచి తప్పుకోవాల్సి వస్తోంది. పీసీబీ నా ఫీజును చెల్లించకపోవడమే అందుకు కారణం. నేను ఇంతకాలం వేచి చూసినా ఇంకా వారు అబద్ధాలు చెప్తూనే ఉన్నారు. పాకిస్థాన్లో మళ్లీ అంతర్జాతీయ క్రికెట్ను తీసుకురావడంలో నా వంతు కృషి చేద్దామని అనుకున్న నాకు ఇలా మధ్యంతరంగా వెళ్లి పోవడం బాధ కలిగిస్తోంది. కానీ ఇక్కడ నాతో బోర్డు వ్యవహరించిన తీరుకు నిష్క్రమించక తప్పట్లేదు. మీరందరూ నా పరిస్థితిని అర్థం చేసుకుంటారని ఆశిస్తున్నాను"
-జేమ్స్ ఫాల్కనర్, ఆస్ట్రేలియా మాజీ బౌలర్
అందులో నిజం లేదు..
ఫాల్కనర్ ఆరోపణలపై స్పందించిన పీసీబీ, క్వెట్టా గ్లాడియేటర్స్ యాజమాన్యం .. అవన్నీ అర్థరహిత ఆరోపణలని తోసిపుచ్చాయి. ఇందుకు సంబంధించి సంయుక్త ప్రకటనను విడుదల చేశాయి. ఫాల్కనర్పై జీవితకాలం నిషేధం విధిస్తున్నట్లు పీసీబీ ప్రకటించింది.
" మాపైన ఫాల్కనర్ ఈ తరహా ఆరోపణలు చేసినందుకు చింతిస్తున్నాం. గతేడాది నుంచే పీఎస్లో భాగమైన ఫాల్కనర్కు ఏ లోటు రాకుండా చూసుకున్నాం. ఈ ఏడేళ్లలో ఏ ఆటగాడు కూడా మాపై ఎలాంటి ఫిర్యాదులు చేయలేదు. మేం చేస్తున్న కృషికి వారు ప్రశంసించేవారు."
-పాకిస్థాన్ క్రికెట్ బోర్డు
లేఖలోని మరిన్ని వివరాలు..
ఫాల్కనర్కు 70 శాతం ఫీజును చెల్లించేశామని.. మిగిలిన 30 శాతానికి పీఎస్ఎల్ లీగ్ ముగిసిన 40 రోజుల దాకా గడువుందని స్పష్టం చేసింది పీసీబీ. ప్రస్తుతం ఫాల్కనర్కు ఎలాంటి బాకీలు లేమని పేర్కొంది.
"2021 డిసెంబరులో ఫాల్కనర్ ఏజెంట్.. ఫీజు చెల్లింపుల కోసం యూకేలోని బ్యాంకు అకౌంట్ వివరాలు ఇచ్చాడు. మళ్లీ ఈ ఏడాది జనవరిలో ఆస్ట్రేలియాలోని బ్యాంక్ అకౌంట్కే ఫీజు పంపాలంటూ ఆ వివరాలు అందించాడు. కానీ ఫాల్కనర్కు మేం అతని పాత అకౌంట్కే 70 శాతం ఫీజును చెల్లించాం. తనకు డబ్బులు అందినట్టు ఫాల్కనర్ కూడా నిర్ధరించాడు."
-పాకిస్థాన్ క్రికెట్ బోర్డు
ఇదీ చూడండి : టీ20ల్లో రోహిత్ రికార్డును సమం చేసిన కోహ్లీ
