ఇంగ్లాండ్తో ఐదు టెస్టుల సిరీస్కు యువ బ్యాట్స్మెన్ పృథ్వీ షా, దేవదత్ పడిక్కల్ను(Prithvi Shah, padikkal) తీసుకోకుండా, అభిమన్యు ఈశ్వరన్ను ఎంపిక చేయడం చర్చనీయాంశమవుతోంది. టీమ్ఇండియా మేనేజ్మెంట్ వారిని ఆడించాలని విజ్ఞప్తి చేసినప్పటికీ సెలక్షన్ కమిటీ ఛైర్మన్ చేతన్ శర్మ ఆ అభ్యర్థనను పట్టించుకోలేదని తెలిసింది! గాయపడిన శుభ్‌మన్‌ గిల్ స్థానాన్ని ఈ ఇద్దరిలో ఒకరితో భర్తీ చేయాలన్నది జట్టు యాజమాన్యం ఉద్దేశమని తెలుస్తోంది.
"న్యూజిలాండ్ ఫైనల్లో శుభమన్ గిల్ గాయపడ్డాడు. దీంతో ఇంగ్లాండ్తో టెస్టు సిరీస్కు పూర్తిగా దూరమయ్యాడు. కోలుకోవడానికి దాదాపు మూడు నెలల సమయం పడుతుంది. ఈ నేపథ్యంలో గతనెల చివర్లో ఇద్దరు ఓపెనర్లను యూకేకు పంపించాలని చేతన్ శర్మకు ఈమెయిల్ ద్వారా వినతి పంపించారు. కానీ దానిని శర్మ పట్టించుకోలేదు. అయితే షా, పడిక్కల్ను తీసుకోవాలని బీసీసీఐ అధ్యక్షుడు గంగూలీ, సెక్రటరీ షాకు ఎటువంటి విజ్ఞప్తి రాలేదు. ప్రస్తుతం ఈ క్రికెటర్లు శ్రీలంక పర్యటనలో ఉన్నారు. జులై 26న ఆ పర్యటన పూర్తవగానే ఇంగ్లాండ్ సిరీస్కు బయలుదేరే అవకాశముంది. కానీ టీమ్మేనేజ్మెంట్ వారిని మిగతా జట్టు బయోబుబుల్లోకి ప్రవేశించకముందే యూకేకు రప్పించాలని ఆశిస్తోంది" అని బీసీసీఐ ప్రతినిధి ఒకరు అన్నారు.
'షా'కు ప్రాముఖ్యత
"షా, ఈశ్వరన్ను పోల్చలేం. వారిద్దరిలో పృథ్వీ చాలా ముందున్నాడు. ఇప్పటికే ఓ టెస్టు సెంచరీ కూడా చేశాడు. అతడు మంచి ఫామ్లో ఉన్నాడు. కాబట్టి అతడు ఉండాల్సింది శ్రీలంకలో కాదు ఇంగ్లాండ్లో. ఇప్పటికైనా షాను త్వరగా జట్టులోకి తీసుకోవాలి. కానీ ఇప్పుడు షాను ఎంపిక చేయడం వల్ల ఈశ్వరన్ ఆత్మవిశ్వాసం కోల్పోయే అవకాశాలు ఉన్నాయి. పడిక్కల్ను ఇప్పుడు పంపించకపోయినా నష్టమేమి లేదు. అన్ని ఫార్మాట్లలో తానేంటో నిరూపించుకోవడం అతడికి పెద్ద విషయం ఏమీ కాదు" అని మాజీ సెలక్టర్ ఒకరు తన అభిప్రాయం వ్యక్తం చేశారు.
ఇదీ చూడండి: Team India: ఇంగ్లాండ్తో టెస్టు సిరీస్కు పృథ్వీ!
